Վազգեն Մանուկյանը մարտի 6-ին կոչ արեց միանալ ՀՓՇ կազմվող-ապակազմվող-կազմվող խմբավորմանը՝ պաշտպանելու համար «այս հայրենիքը, ձեր հայրենիքը»:
Ավելի վաղ ընդդիմությունը հայտարարել էր մարզային հանդիպումներ սկսելու մասին, իսկ Վազգեն Մանուկյանը չէր բացառել, որ ապագայում կարող է շենքեր գրավելու անհրաժեշտություն լինի։
Խոսելով ընդդիմության պայքարի տեխնոլոգիաների մասին՝ «Առաջին լրատվական»-ի հետ զրույցում քաղտեխնոլոգ Արմեն Բադալյանը նկատեց՝ առայժմ ընդդիմությունը սահմանափակվում է տեխնոլոգիաներից միայն հանրահավաքներ իրականացնելով, մնացած բոլոր տեխնոլոգիաները մի կողմ են դրվում։ Իսկ դրանց մեջ մտնում են նաև քաղաքացիական անհնազանդության տեխնոլոգիաները, այն է՝ փողոցներ փակելը։ Բայց մենք տեսնում ենք, որ այս պահին փակված է միայն Բաղրամյան փողոցը, և ոչ ավելին։ Իհարկե, մեկ-երկու անգամ ընդդիմության կողմնակիցները մտան նաև վարչական շենքեր, կառավարական շենքեր՝ իրենց քարոզչությունն անելու համար, բայց եթե ամբողջական պատկերը նայենք, որևէ տեխնոլոգիա չի օգտագործվում՝ բացի հանրահավաքներ կազմակերպելուց։ Իսկ դա տեխնոլոգիական տեսանկյունից ճիշտ չէ, որովհետև կարևորը նաև բովանդակությունն է։ Այս առումով կարևոր են նաև բովանդակությունը տեղ հասցնելու տեխնոլոգիաները։ Տեխնոլոգիական առումով բովանդակությունը տեղ հասցնելու տեխնոլոգիաները ևս կաղում են»։
Բադալյանի դիտարկմամբ՝ հասկանալի է նաև ընդդիմության ռազմավարությունը. «Երկրորդ նախագահը հայտարարել է, որ եթե անգամ արտահերթ ընտրություններ տեղի ունենան գործող վարչապետի գլխավորությամբ, ինքը մասնակցելու է և, իր խոսքերով ասած, «կրելու»։ Բայց ինչպես հասկանում ենք՝ սցենարն այսպես են պատկերացնում. նախ կստեղծվի ժամանակավոր կառավարություն՝ Վազգեն Մանուկյանի գլխավորությամբ, որը մեկ տարի իր գործունեությունը կիրականացնի, իսկ մեկ տարի հետո ընտրություններ տեղի կունենան, որին կմասնակցի նաև երկրորդ նախագահն իր կողմնակիցներով։ Եթե մեկ տարվա ընթացքում հաջողվի հասնել վարչապետի հրաժարականին, ապա «Իմ քայլը» դաշինքը, որպես քաղաքական միավոր, կդադարի գոյություն ունենալ։ Ընդդիմությունը բացահայտ ասում է՝ Վազգեն Մանուկյանը մեկ տարով է, հետագայում չի ստանձնելու որևէ պաշտոն, չի մասնակցելու ընտրություններին։ Իր ղեկավարած ԱԺՄ կուսակցությունը մարդ կուսակցություն է, իրենից լուրջ բան չի ներկայացնում։ Իհարկե, եթե նա դառնա անցումային վարչապետ, կարող է վարչական ռեսուրս կիրառելով ԱԺՄ-ն դարձնել բավականին լուրջ կառույց, բայց դա տեսականորեն, որովհետև նա հայտարարել է, որ մեկ տարի հետո չի մասնակցելու մեկ տարի հետո կայանալիք ընտրություններին»։
Մեր զրուցակցի խոսքով՝ Հանրապետական կուսակցությունն ու երկրորդ նախագահի թիմն իրարից անջատ են գործելու: «Գործող վարչապետը այլևս չունի այն վստահությունը, որ ուներ 2018 թվականին։ Եթե իրադարձությունները զարգանան այն սցենարով, որ նրա դեմ հարուցվեն քրեական գործեր, ապա նրա կողքը որևէ մեկը չի մնա։ Իր ղեկավարած դաշինքն էլ այլևս կդադարի գոյություն ունենալ։ Այս պահի դրությամբ կարող ենք արձանագրել նաև, որ երկրորդ ու երրորդ նախագահներն էլ առանձին են։ Բարդ է ասել սրա պատճառները, բայց երկրորդ ու երրորդ նախագահների միջև չկա տանդեմ։ Նրանք իրար մրցակից էին նախկինում, իսկ հիմա բարդ հարաբերություններ ունեն։ Երկուսի միջև չկա դաշինք, պարզապես ժամանակավոր միություն է՝ ընդդեմ գործող վարչապետի, և ոչ ավելին։ Միանշանակ կարող ենք ասել, որ այս պահին նրանք իրար հավասար չեն։ Երկրորդ նախագահը ավելի բարձր քաղաքական կարգավիճակ ունի։ Գաղտնիք չէ, որ Հայաստանը գտնվում է Ռուսաստանի ազդեցության տակ, իսկ Ռուսաստանի տեսանկյունից Հայաստանում միակ վստահություն ներշնչող գործիքը, որի հետ իրենք լավ հարաբերություններ ունեն, երկրորդ նախագահն է։ Իսկ երրորդ նախագահը Ռուսաստանի կողմից մերժված անձնավորություն է»,- եզրափակեց Արմեն Բադալյանը։
