«ԳՇ հայտարարությամբ պայմանավորված փուլը ավարտված լինել-չլինելը կախված է դերակատարների ցանկությունից և որոշումից: Ինչպես տեսնում ենք՝ 17 ուժերը միտում չունեն հասկանալու, որ արդեն ամեն ինչ ավարտված է: Նրանք անընդհատ փորձելու են ամեն ինչ անել, որ հնարավոր լինի բանակն ավելի շատ ներքաշել քաղաքական գործընթացների մեջ»,- այս մասին «Առաջին լրատվական»-ի հետ քննարկման ժամանակ նշեց «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանը:
«Եթե նշված օրենքը սահմանադրական է (իսկ ես համոզված եմ, որ սահմանադրական է), ապա վարչապետի որոշումն օրինական է և նախագահը այն չստորագրելու պատճառ չունի: Եվ այդ օրենքն ուժի մեջ չմտնելու որևէ պատճառ չկա»,- նշեց Ալեքսանյանը:
Սոցիոլոգ Արտակ Սաղաթելյանի դիտարկմամբ՝ եթե գեներալների հայտարարությունն ավելի լայն աջակցություն ստանար, միգուցե իրավիճակը բարդանար, սակայն սովորաբար հեղաշրջում անելիս նախապես չեն հայտարարում այդ մասին. «Գեներալների հայտարարությունը լարվածություն է առաջացրել ներքաղաքական կյանքում: Բայց պետք է փաստել, որ նաև իշխանության կողմից արված անզգույշ արտահայտության հետևանքով է հրահրվել այս իրավիճակը»
Սոցիոլոգը նաև կարծիք հայտնեց, որ թե՛ ընդդիմադիրներին, և թե՛ Ռուսաստանին այս լարվածությունը ձեռնտու է. «Ընդդիմությանը ձեռնտու է, իշխանությունը հետ վերցնելու ակնկալիքով, իսկ Ռուսաստանին ձեռնտու է Հայաստանը ամբողջապես գաղութատիրության վերածելու համար: Իսկ իշխանությանը և մեր ժողովրդին այս լարվածությունը ձեռնտու չէ»:
«Սահմանադրությամբ բանակը ապաքաղաքական կառույց է, և տվյալ դեպքում ԳՇ հայտարարության հանգամանքը շահարկելը թե՛ ընդդիմադիրների, թե՛ իշխանության կողմից, ներքին և նաև արտաքին լսարաններին «սիգնալներ» տալ է այն մասին, որ բանակը կարող է մասնակից դառնալ քաղաքական պրոցեսների՝ ելնելով ճգնաժամային բարդ իրավիճակից: Ես դա բացառում եմ: Իմ կարծիքով՝ ռազմական հեղաշրջումը տեղի է ունենում գործնականում, այլ ոչ թե ենթադրության համատեքստում, որը կատարեց վարչապետը»,- նշեց «Արդար Հայաստան» կուսակցության փոխնախագահ Դավիթ Կարապետյանը՝ հավելելով, որ մեր երկրի Զինված ուժերը երբեք ոչ մեկի կողմը չեն անցնի, բանակը չի կարող կողմ լինել, բանակը մեր անվտանգության առաջին երաշխավորն է:
Քննարկման մասնակիցների դիտարկմամբ՝ ներքին պառակտում է գնում, լուրջ քաղաքական ճգնաժամ է, ընդդիմությունը և իշխանությունը շարունակում են «փոխհրաձգությունները»:
Վահագն Ալեքսանյանը կարծիք հայտնեց, որ թե՛ երկրորդ, թե՛ երրորդ նախագահները քաղաքականապես սպառված են. «Քաղաքական ռեսուրսը քաղաքական ուժի համակիրներն ու գաղափարակիցներն են: Քանի՞ գաղափարակից ունեն նրանք»:
Մանրամասները՝ տեսանյութում:
