«Առաջին լրատվականը» փորձեց պարզել, թե այս տարի որտեղ են հանգստանալու կամ հանգստանում ՀՀ նախարարները:
ՀՀ տարածքային կառավարման նախարարության լրատվական ծառայությունից կարողացանք պարզել, որ ՀՀ տարածքային կառավարման նախարար Արմեն Գևորգյանն օգոստոսի 1-ից գտնվում է արձակուրդում, սակայն հայտնի չէ՝ ուր է գնացել հանգստանալու և որքան ժամանակով: Արտաքին գործերի նախարարությունից էլ կարողացանք պարզել, որ Էդվարդ Նալբանդյանը ներկայում արձակուրդում է ու հանրապետությունում կլինի 20 օրից: Հայտնի է միայն, որ նա իր արձակուրդն անցկացնում է արտերկրում, ավելի կոնկրետ՝ եվրոպական երկրներից մեկում:
Հայաստանի Հանրապետության առողջապահության նախարարության հասարակայնության հետ կապերի բաժինը հրաժարվեց որևէ տեղեկատվություն տրամադրել: Նույնը վերաբերում է արտակարգ իրավիճակների նախարարությանը, որտեղ ընդհանրապես հրաժարվեցին մեկնաբանել նախարարի արձակուրդի հետ կապված որևէ հարց: Կարողացանք միայն պարզել, որ ներկայում առողջապահության նախարար Հարություն Քուշկյանը աշխատանքի է:
Արդարադատության նախարար Հրայր Թովմասյանը, լրատվական բաժնի տեղեկացմամբ, դեռևս աշխատանքի է: Վերջինս չցանկացավ հրապարակել իր արձակուրդի մասին որևէ տեղեկատվություն: Գյուղատնտեսության նախարար Սերգո Կարապետյանը, էներգետիկայի և բնական պաշարների նախարար Արմեն Մովսիսյանը ներկայում աշխատում են ու չեն մեկնելու հանգստանալու: Տրանսպորտի և կապի նախարար Մանուկ Վարդանյանը օգոստոսին չի մեկնելու հանգստանալու, իսկ թե ուր կմեկնի հետագայում՝ դեռ հայտնի չէ:
ԿԳ նախարարության հասարակայնության հետ կապերի բաժնից տեղեկացրին, որ կրթության ու գիտության նախարար Արմեն Աշոտյանը հուլիսի 25-ից օգոստոսին 12-ը ներառյալ գտնվում է արձակուրդում և հայտնի չէ՝ որտեղ է անցկացնում իր արձակուրդը:
Պաշտպանության նախարար Սեյրան Օհանյանը ներկայում աշխատանքի է, ու ինչպես տեղեկացրին ՊՆ մամլո ծառայությունից, վերջին 3 տարում, ելնելով աշխատանքային ծանրաբեռնվածությունից, չի մեկնել արձակուրդի ու ներկայում արձակուրդի մեկնելու ծրագիր չունի:
Սփյուռքի նախարար Հրանուշ Հակոբյանը միակն է կարծես, որ հասցրել է հանգստանալ ու օգոստոսի 1-ից արդեն անցել է իր աշխատանքային պարտականությունների կատարմանը: Տիկին նախարարն իր արձակուրդն անցկացրել է հայրենի Սարուխան գյուղում:
Ֆինանսների նախարար Վաչե Գաբրիելյանը ներկայում գտնվում է արձակուրդում, սակայն հայտնի չէ՝ որտեղ:
