Ադրբեջանական APA լրատվական գործակալության փոխանցմամբ՝ PFC Energy քոնսալթինգային ընկերությունը հետազոտություն է անցկացրել Nabucco գազատարի նախագծի կյանքի կոչման ժամկետի շուրջ։
«Եվրոպական հարավային միջանցք. ինչպիսի՞ տեսք կունենա այն» խորագրով հետազոտությունում նշված է, որ ավելի խոշոր նախագծերի, ինչպիսին Nabucco-ն է, իրագործումը կարող է տեղի ունենալ 2020 թվականից հետո՝ կախված հանգամանքներից։
Հետազոտությունը հենվում է այն գործոնների վրա, որոնք կարող են իրենց ազդեցությունը թողնել հարավային գազային միջանցքի զարգացման, առաջիկա 10 տարում Ադրբեջանում ակնկալվող գազի արդյունահանման, խողովակաշարերի ընտրության չափանիշների և այլնի վրա։
Հետազոտության համաձայն՝ դեպի Եվրոպա գազի փոխադրման հարցում տարբեր աղբյուրները (Ադրբեջան, Թուրքմենստան, Իրան, Իրաք) մրցակցում են միմյանց հետ։ Սակայն միայն մեկ աղբյուրը՝ ադրբեջանական «Շահ Դենիզ» գազային հանքավայրի երկրորդ փուլի շրջանակներում արդյունահանվելիք գազը կարող է հասանելի լինել մինչև 2020 թվականը։ Գազի մեծ ծավալի բացակայությունը նշանակում է, որ ներկայումս կարող է կյանքի կոչվել միայն մեկ խողովակաշարի նախագիծ։
PFC Energy-ի փորձագետների կարծիքով՝ հաջորդ փուլում, երբ Ադրբեջանի մյուս գազային հանքավայրերի գազը կդառնա հասանելի, կարող են կյանքի կոչվել մի շարք այլ նախագծեր, այդ թվում նաև Nabucco-ն։
Ներկայումս ամենահավանականը İTGİ (Թուրքիա-Հունաստան-Իտալիա) նախագծի զարգացումն է։
Հիշեցնենք, որ ավելի վաղ նշվում էր, թե Nabucco-ն շահագործման է հանձնվելու 2014 թվականին, մինչդեռ ներկայումս նշում են 2017 թվականը։
