Թուրքիայի արտաքին գործերի նախարար Չավուշօղլուն անդրադարձել է Հայաստանում տեղի ունեցող իրադարձություններին և հայտարարել, թե դատապարտում են «ռազմական հեղաշրջման փորձը» և ընդհանրապես դեմ են ցանկացած ռազմական հեղաշրջման: Առերևույթ Անկարայի մի «ցավը» պարզ է՝ 2016-ի հուլիսին ռազմական հեղաշրջման փորձ արեց Թուրքիայի զինվորականությունը Էրդողանին հեռացնելու համար, սակայն նույն Էրդողանի խոսքով՝ Ռուսաստանը իրեն ժամանակին զգուշացրեց վտանգի մասին, և զինվորականներին ընդամենը 15 րոպե չբավականացրեց Էրդողանին ձերբակալելու համար:
Ի դեպ, մի խիստ ուշագրավ զուգադիպություն էր այն, որ 2016-ի հուլիսի 15-ի գիշերը թուրքական հեղաշրջման փորձին արդեն 16-ի գիշերը Հայաստանում հաջորդեց ՊՊԾ գնդի գրավման, զինված ապստամբության փորձը, որի վերաբերյալ դատավճիռն, ի դեպ, հրապարակվեց նախօրեին: Սա ևս մի հատկանշական հանգամանք է, որ առնվազն առաջացրել է հարցեր՝ կապված ներքաղաքական զարգացումների հետ: Իհարկե, երեկ դեռ որևէ մեկը չէր սպասում, որ դրանք կարող են ակնթարթային արագությամբ գերհասունանալ այսօր:
Վերադառնալով Թուրքիայի դիրքորոշմանը՝ ակնհայտ է, որ Անկարան փորձում է իր դիրքորոշումով խաղալ Հայաստանի ներքին իրողությունների վրա: Թուրքիայում անշուշտ հիանալի ուսումնասիրել են հայաստանյան հետպատերազմական ներքին քննարկումներն ու հռետորաբանությունը և արձանագրել, թե ինչ շեշտադրումներ կան Թուրքիայի առումով: Ըստ այդմ անկասկած արձանագրել են, որ այն, ինչ Հայաստանում կաջակցի Թուրքիան, կարժանանա ընդդիմության հակառակ վերաբերմունքին, և այն, ինչ կդատապարտի Թուրքիան, փաստարկ կդառնա ընդդիմության ձեռքին: Ասել կուզի՝ երբ Թուրքիան դատապարտում է Հայաստանի ԳՇ հայտարարությունը, ապա այն ողջունած արմատական ընդդիմությունը մեծ հավանականությամբ Թուրքիայի այդ դիրքորոշումը կդարձնի իր ձեռքին փաստարկ, թե՝ «տեսեք, Անկարան դեմ է Նիկոլ Փաշինյանի հեռացմանը, հետևաբար մենք իրավացի էինք, որ Փաշինյանը գործում է թուրքական շահերի ծիրում»:
Թուրքերը անշուշտ ուշադրությամբ հետևել են այդ հռետորաբանությանը անցած ամիսների ընթացքում, և ակնառու է, որ դատապարտելլով «ռազմական հեղաշրջումը», այսպես ասած՝ Փաշինյանի անուղղակի աջակցության տոնայնությամբ հայտարարություն անելով՝ իրականում հմտորեն, իրենց բնորոշ հնարամտությամբ յուղ են լցնում նրա ընդդիմախոսների կրակին:
Պետք է հետևել, թե ովքե՞ր են օգտվելու Հայաստանում Թուրքիայի այդ «ծառայությունից»: