Արցախի Ազգային ժողովի պատգամավորները շրջանառության մեջ են դրել «Լեզվի մասին» 2013 թվականին ընդունված օրենքում փոփոխությունների նախագիծ։ Նախագծով նախատեսվում է ռուսերենը ևս դարձնել ԱՀ պաշտոնական լեզու։
«Լեռնային Ղարաբաղի Հանրապետությունը խրախուսում է հայերեն և ռուսերեն լեզուներով հրատարակությունները, մամուլը, ինչպես նաև հայերեն և ռուսերեն դասագրքերի, ուսումնական ձեռնարկների, տեղեկատու, գիտամեթոդական, գիտահանրամատչելի գրականության ստեղծումը»,- նշված է նախագծում: Որպես հիմնավորում նշվում է. «Հաշվի առնելով Արցախի և Ռուսաստանի մշակութային, ռազմական, տնտեսական հարաբերությունների պատմական հիշողությունը և այն փաստը, որ բազմաթիվ արցախցիների համար շփման երկրորդ լեզու է հանդիսանում ռուսերենը` կարևոր ենք համարում նոր որակի հարաբերությունների վերաարժևորումը և նոր օրակարգի ձևավորումը: Այս համատեքստում առաջնահերթ ենք համարում ռուսաց լեզվի կարգավիճակի բարձրացումը, ինչն անհրաժեշտ պայմաններ կստեղծի բոլոր ոլորտներում համագործակցությունը խորացնելու համար, իսկ տեսանելի ապագայում կնպաստի իրավական շրջանակներում հարաբերությունների զարգացմանը: Արցախում ռուս խաղաղապահների երկարաժամկետ ներկայության և բազմաթիվ սոցիալական և հաղորդակցային խնդիրների համատեղ լուծման անհրաժեշտության ըմբռնումը, շինարարության, առողջապահության, կրթության և գիտության ոլորտներում համագործակցությունը պահանջում են ռուսաց լեզվի դերի վերագնահատում»:
Քաղաքագետ Ռոբերտ Ղևոնդյանի կարծիքով՝ անկախ մեր ցանկությունից՝ հետպատերազմյան իրողություններն Արցախում այնպիսին էին, որ իշխանությունը փաստացիորեն ռուս խաղաղապահ կոնտինգենտի ձեռքերում է: «Հասկանալի է, որ այդ մարդիկ ոչ միայն խաղաղապահ առաքելություն են իրականացնում, այլև ապրում են, կլինեն այնպիսիք, որ իրենց ընտանիքները կտեղափոխեն այնտեղ։ Այսինքն՝ միայն լեզվի խնդիրը չէ, երկարաժամկետ ապագայում մենք ժողովրդագրության խնդիր կունենանք։ Այս կոնտինգենտը, լինելով այնտեղ, կցանկանա, որ ռուսաց լեզվին կարգավիճակ տրվի, որովհետև միայն հայոց լեզվով շփումները հասկանալի չեն լինի։ Չեմ կարծում, որ իրենց գործունեությունը հինգ տարով սահմանափակվելու է, ու բնական է, որ Ռուսաստանը պետք է նման հետաքրքրություն ցուցաբերեր։ Խնդիրն այստեղ ժողովրդագրական պատկերի փոփոխությունն է»,- «Առաջին լրատվական»- հետ զրույցում ասաց նա։
Ըստ նրա՝ այն, որ Արցախը քաղաքակրթական առումով արդեն սահմանազատվում է մայր հայրենիքից, արդեն խնդիր է. «Անկախ նրանից՝ ռուսերենն Արցախում կդառնա պետական լեզու, թե ոչ, պետք է ամեն կերպ հնարավոր լինի քաղաքակրթական, փոխհարաբերությունների առումով հայկական պահել Արցախը։ Կա վտանգ, որ երկարաժամկետ հեռանկարում հնարավոր է Հայաստանի ու Արցախի քաղաքակրթական զարգացման ուղիների իրարից հեռացում։ Սա շատ վատ հեռանկար է, և հնարավոր է Արցախի առհասարակ օտարում Հայաստանից»։
