Հունական «Վիմա» («Տրիբունա») թերթի փոխանցմամբ՝ Հունաստանի պաշտպանության նախարարությունը պատրաստվում է Թուրքիայի հետ ցամաքային սահմանի ողջ երկայնքով փորել տալ 120 կիլոմետրանոց հակատանկային փոս, որն ունենալու է 7 մետր խորություն ու 30 մետր լայնություն։
Այդ կառույցը լինելու է Հունաստանի ողջ պատմության ընթացքում խոշորագույներից մեկը և ծառայելու է միանգամից երկու նպատակի.
ա) պատերազմի սկսման դեպքում դժվարեցնել թուրքական զորքերի առաջխաղացումը,
բ) դադարեցնել Հունաստանի տարածքով Թուրքիայից ԵՄ-ի երկրներ ապօրինի ներգաղթյալների հոսքը:
Բացի այդ, նախագիծը, որում ներգրավված են նաև քաղաքացիական մասնագետները, կոչված է ծառայելու նաև քաղաքացիական նպատակներին. փոսը կարող է դառնալ սահմանամերձ շրջանների ոռոգման համակարգի մի մասը։
Փոսի կառուցման աշխատանքներն արդեն իսկ մեկնարկել են։ Հույները երկրի հյուսիսային սահմանամերձ հատվածում արդեն փորել են մոտ 14.5 կիլոմետրանոց փոս։ Փոսը փորում են բացառապես հունական բանակի զինվորները, սպաներն ու քաղաքացիական անձնակազմը։ Նախագիծը ֆինանսավորվում է հունական բանակի բյուջեից։
Հիշեցնենք, որ ներկայումս Հունաստանն ու Թուրքիան ունեն բազմաթիվ խնդիրներ. Կիպրոսի հարցը, Էգեյան ծովի համալիր խնդիրներ. կղզիների պատկանելիություն, տարածքային ջրերի ու օդային սահմանների հստակեցում, մայրցամաքային շելֆի բաժանում և այլն։
