AstraZeneca պատվաստանյութը խորհուրդ է տրվում օգտագործման համար, այդ թվում՝ COVID-19-ի նոր մանրէաիմքի տարածման երկրներում, չնայած հիվանդության ծանր դեպքերի վրա դեղամիջոցի ազդեցության մասին տվյալների պակասին։ Ժնևում կայացած մամուլի ասուլիսում այս մասին հայտարարել է Առողջապահության համաշխարհային կազմակերպության իմունիզացիայի փորձագետների ռազմավարական խորհրդատվական խմբի ղեկավար Ալեխանդրո Կրավիոտոն։
«Մենք խորհուրդ ենք տվել, որ նույնիսկ եթե կա այդ պատվաստանյութի ամբողջական հնարավորությունների կրճատում, հատկապես ծանր դեպքերի դեմ, պատվաստանյութի օգտագործումը խորհուրդ չտալու պատճառ չկա, նույնիսկ այն երկրներում, որտեղ կա վիրուսի այս (հարավաֆրիկյան) տարբերակը», – ասել է նա:
Ինչպես հաղորդում է «ՌԻԱ Նովոստի»-ն, նրա խոսքով՝ փորձագիտական խումբն ուսումնասիրել է պատվաստանյութի հնարավորությունները, մասնավորապես, Հարավային Աֆրիկայում շրջանառվող մանրէահիմքի և Մեծ Բրիտանիայում հայտնաբերված մանրէահիմքի դեմ:
Բրիտանական տարբերակի դեմ պատվաստանյութը ցույց է տվել իր բարձր արդյունավետությունը, սակայն ՀԱՀ-ի շտամի վերաբերյալ անցկացված հետազոտություններում «նախնական վերլուծությունը ցույց է տվել, որ կա թեթև կամ միջին դեպքերի դեմ պատվաստանյութի արդյունավետության կրճատում, ինչպես նաև հակամարմինների արտադրության կրճատում»:
Կրավիոտոն նշել է, որ թեստերի փոքր քանակությունը թույլ չի տալիս խոսել այն մասին, թե որքան արդյունավետ է պատվաստանյութը ՀԱՀ-ի շտամմով վիրուսի ծանր հիվանդության դեպքում: Սակայն «կան անուղղակի ապացույցներ», որ դեղը, այնուամենայնիվ, արդյունավետ է վիրուսի դեմ:
Իր հերթին, Առողջապահության համաշխարհային կազմակերպության գլխավոր գիտաշխատող Սումիա Սվամինաթանը հայտարարել է, որ ներկայիս առաջարկությունները չափազանց կարևոր են, քանի որ AstraZeneca-ն COVAX ծրագրի հիմնական պատվաստանյութն է:
«Սա կարևոր հանգրվան է, որը, ինչպես ակնկալում ենք, կշարունակվի արտակարգ իրավիճակներում օգտագործելու համար պատվաստանյութի երաշխավորությամբ»,- նշել է նա:
