Հաշվի առնելով վերջին շրջանի զարգացումները, առաջիկայում ռուս-ամերիկյան խոր ճգնաժամը, կարծես, անխուսափելի է։ Ամերիկյան կողմը կարծես թե ուզում է հաստատել գլոբալ խաղացնողի և վերահսկողի իր ֆունկցիաները, իսկ Արցախում Պուտինը կարծես թե խաղաց իր հաղթական պարտիան, որի վերջաբանը, կարծես, անորոշ է։
Ի՞նչ է լինելու ապագայում, ի՞նչ սպասել առաջիկայում․ «Առաջին լրատվական»-ի հարցին Քաղաքական գիտության Հայաստանի ասոցիացիայի գործադիր տնօրեն Բենիամին Պողոսյանը պատասխանեց․ «Ես այնքան էլ չէի համաձայնի, որ Արցախում տեղի ունեցածի ապագան անորոշ է։ Ամեն ինչ շատ հստակ է, և գոնե առաջիկա 5 տարում ես չեմ տեսնում ստատուս-քվոյի փոփոխություն՝ այն, ինչ մնացել է Արցախից, վերածվել է ռուսական պրոտեկտորատի։ Հասկանալի է, որ ռուս խաղաղապահները առնվազն մինչև 2025 թվականի նոյեմբեր կմնան այնտեղ։
Փոփոխություններ, իմ գնահատմամբ, հնարավոր են, իհարկե՝ ոչ արմատական, սակայն Ադրբեջանը շարունակելու է քաղաքականություն իրականացնել երկու ուղղությամբ։ Նախ փորձելու է հնարավորինս արագ վերականգնել Արցախի օկուպացված տարածքները, որոնք այժմ իր վերահսկողության ներքո են։ Մենք արդեն տեսնում ենք, որ այդ ուղղությամբ Ադրբեջանն արդեն ինտենսիվ քայլեր է ձեռնարկում՝ թե՛ ավտոճանապարհի կառուցում, թե՛ Ֆիզուլիում օդանավակայանի կառուցման աշխատանքների նախապատրաստում։ Հասկանալի է, որ այդ ներդրումների կենտրոնը լինելու է Շուշին, և Ադրբեջանը փորձելու է Շուշին վերածել Հարավային Կովկասի Դուբայի։ Հաջորդ քայլը լինելու է առանց լարվածության կտրուկ աճի Արցախում ռուսական հսկողության տակ գտնվող տարածքներից հայ բնակչության դուրս բերումը։ Կրկնում եմ՝ առանց լարվածության կտրուկ աճի, որովհետև լարվածությունը թույլ չի տա նշված տարածքում ներդրումներ իրականացնել»։
Մանրամասները՝ տեսանյութում։
