«Առաջին լրատվական»-ի զրուցակիցն է քաղաքագետ Արմեն Գրիգորյանը:
– Պարոն Գրիգորյան, արդեն ուրվագծվում է, որ ընդդիմադիր ուժերի «17+» ֆորմատը փլուզվում է։ Ընդդիմությանը չհաջողվեց հասնել իր առաջ դրված նպատակին՝ հեռացնել օրվա իշխանությանը։ Արդեն կայացել է ընդդիմադիր ուժերի լիդերների հանդիպում։ Ի՞նչ զարգացումներ կարող են լինել այս ֆոնին։
– Բավական ուշագրավ իրադարձություններ են տեղի ունենում, կարելի է ենթադրել՝ չեն կարողացել մարտավարության վերաբերյալ համաձայնության գալ, կամ ոմանց մեջ ցայտնոտի զգացում է առաջացել:
Ընդամենը օրեր առաջ ՀՅԴ մի բարձրաստիճան ներկայացուցիչ պնդում էր, որ ընտրությունները պետք է կազմակերպի Վազգեն Մանուկյանը՝ որպես քաղաքական ամբիցիաներ ունեցող մարդ. մինչ այդ արդեն իսկ կարելի էր ենթադրել, որ իրական ամբիցիաներ ունեցողը Ռոբերտ Քոչարյանն էր, որի շուրջ էլ հավաքվել էին այդ 17-ը: Այնուհետև մեկ այլ կարկառուն ընդդիմադիր էլ «փրկության» բանալի էր հռչակել Վ. Մանուկյանի և «երկրորդ ու երրորդ նախագահների» միավորումը՝ այդպիսով առավե՛լ ընդգծված կերպով բացահայտելով, թե ովքեր են իրական ամբիցիաներ ունեցողները:
Կարծում եմ՝ արդեն երևում են վերադասավորման որոշ փորձեր, որոնցից մեկն արդեն ՀՀ անկախության բացահայտ հակառակորդների ի հայտ գալն է: Կարող են ակտիվանալ նաև անկարգություններ հրահրելու կամ բռնի գործողությունների միջոցով քաղաքական նպատակներին հասնելու կողմնակիցները, ընդ որում՝ ոչ միայն «17»-ի կազմից:
– Ռոբերտ Քոչարյանի՝ արտահերթ խորհրդարանական ընտրություններին մասնակցելու մասին հայտարարությունից հետո նշմարվեց 17 ուժերի փլուզումը։ Հնարավոր համարո՞ւմ եք, որ ֆորմատի փլուզումից հետո ընդդիմադիր ուժերը, որոնք դեմ էին ընտրություններին, արդեն առանձին-առանձին գնան ընտրությունների, եթե դրանք, իհարկե, կայանան։
– Արտահերթ ընտրություններ կարծես թե չեն կայանա՝ համենայնդեպս, եթե գործող իշխանությունը լուրջ ճնշման չենթարկվի: Բայց առանձին-առանձին ընտրությունների գնալը՝ արտահերթ թե հերթական, կախված կլինի Կուսակցությունների մասին օրենքի և Ընտրական օրենսգրքի որոշ դրույթներից, նաև նրանից, թե ով կֆինանսավորի այդ կուսակցություններին՝ հատկապես, այսպես կոչված, «մարդ-կուսակցությունների» պարագայում:
– Քաղաքական շրջանակներում քննարկվում է Սերժ Սարգսյանի ու Ռոբերտ Քոչարյանի հնարավոր միավորման թեման։ Որքանո՞վ եք դա հավանական համարում։ Նիկոլ Փաշինյանի իշխանության հեռացման ցանկությունը կարո՞ղ է միավորել երկու՝ իրար հետ մրցակցող նախագահներին։
– Գուցե կարող են միավորվել, բայց գոնե առայժմ կարծես թե գործում են «միավորվելու համար նախ պետք է տարանջատվել» սկզբունքով: Մեկի՝ առավել արմատական գործողությունների կողմնակից, իսկ մյուսի՝ առավել զգուշավոր լինելը ևս կարող է նպաստել կարճաժամկետ հեռանկարի առումով տարանջատվելուն:
– Իսկ դատելով իշխանության տրամադրվածությունից՝ արտահերթ ընտրություններ առհասարակ կլինե՞ն, եթե Ձեր ասածի պես իշխանության վրա ճնշումներ լինեն։
– Եթե իշխանության տրամադրվածությունը որոշիչ գործոն է՝ չեն լինի:
