Խոսելով մեր երկրում արտագաղթի առկա ծավալների մասին՝ ժողովրդագիր Համլետ Սարգսյանը «Առաջին լրատվականի» հետ զրույցում հայտնեց.
«Այն, որ արտագաղթի չափերը ավելացել են, պայմանավորված է ոչ միայն աշխատատեղերի պակասով, այլև ընդհանրապես սոցիալ-տնտեսական պայմանների վատացմամբ։ Իհարկե կառավարությունը մարդկանց ետ բերելու փորձ կատարում է, բայց դա կարծես թե չի հաջողվում։ Մարդիկ երբ հուսահատ են, այդ հուսահատությունը նրանց չի թողնում, որ կողմորոշվեն»։
«Առաջին լրատվականի» հարցին, թե ներգաղթը կարո՞ղ է լուծել Հայաստանի ժողովրդագրական ճգնաժամը, Հ. Սարգսյանը պատասխանեց.
«Զանգվածային ներգաղթ ես չեմ սպասում, և հնարավոր էլ չէ։ Այո, եթե զանգվածային ներգաղթ լինի, եթե Հայաստան գա պտղաբեր հասակի բնակչություն, դա ինչ-որ չափով կօգնի, բայց քանի որ նման բան չի կարող լինել, և հակառակը, աշխատող մեր զանգվածը հեռանում է հայրենիքից և դրսում ավելի հարմար աշխատանք գտնում, ուստի իրատեսական չէ ժողովրդագրական ճգնաժամի լուծման սպասել ներգաղթի միջոցով»։