Ինչպես նշում են մասնագետները, ներկա տնտեսական ճգնաժամը հերքում է կայացած մի շարք օրենքներ: Եթե նախկինում կարծում էին, որ երբ ներդրողները խուսափում են ռիսկային ակտիվներից, սկսում է աճել շվեյցարական ֆրանկը, իսկ երբ ներդրողները ցանկանում են գումարները տեղափոխել հումքի ակտիվների մեջ, ապա սկսում են աճել կանադական և ավստրալական դոլարները: Հիմա աճում են երեքը միասին, ընդ որում՝ արագ աճում են՝ ընդդեմ ԱՄՆ դոլարի և եվրոյի: Այս մասին The Financial Times-ին ասել է UBS բանկի օտարերկրյա արտարժույթի փոխանակման բաժնի տնօրեն Մանսուր Մոհի Ալ-Դինը:
Մասնագետը նշել է, որ այս իրավիճակը ստեղծվել է ԱՄՆ-ում, Եվրոպայում և Ճապոնիայում ստեղծված տնտեսական բարդ իրավիճակի հետևանքով, ինչը ազդում է նաև նրանց արտարժույթների վրա: «Ստվերային արտարժույթներին» չի հերիքում լիկվիդայնությունը, սակայն նրանք մի շարք առավելություններ էլ ունեն»,- ասել է մասնագետը՝ հավելելով, որ դրանց մեջ են մտնում կանադական դոլարի սերտ կապվածությունը ամերիկյան դոլարի, ավստրալիական դոլարինը՝ յուանի և շվեյցարական ֆրանկինը՝ հին գերմանական մարկի հետ: Բացի այդ, երեք երկրներն էլ տնտեսական ճգնաժամից դուրս գալու մեծ խնդիրներ չեն ունեցել, իսկ Շվեյցարիայի արտարժույթն ապահովված է ոսկու և արտարժույթի մեծ պաշարներով:
Սակայն միաժամանակ մասնագետներն առաջարկում են ուշադրություն դարձնել այն հանգամանքին, որ ստվերային արտարժույթները կարող են նաև զարգացման բացասական ընթացք ունենալ, քանի որ Գերմանիայի տնտեսության վատթարացումն իր ետևից կտանի նաև շվեյցարական ֆրանկը, չինական տնտեսությունը՝ ավստրալական դոլարը, իսկ ամերիկյան պարտքերի խնդիրը՝ կանադական դոլարը: