Այսօր «Հանուն Հանրապետության» կուսակցության ղեկավար մարմնի ներկայացուցիչ, ԱԺ անկախ պատգամավոր Արման Բաբաջանյանը, «Հանուն Հանրապետության» կուսակցության ղեկավար մարմնի անդամներ Արթուր Մանուկյանի
և Արտակ Մարկոսյանի ուղեկցությամբ աշխատանքային այց կատարեց Տավուշի մարզի Ոսկեպար համայնք: Այցի ընթացքում հանդիպում եղավ համայնքի ներկայացուցչների հետ:
Հանդիպման ընթացքում քննարկվեցին համայնքի բնակիչներին մտահոգող առաջնային հարցեր, մասնավորապես Արցախյան 44 օրյա պատերազմի արդյունքում ստեղծված իրավիճակի, սահմանային գոտում Ադրբեջանի հետ ընթացող աշխատանքների, սահմանային տեղորոշումների, սահմանային վիճելի տարածքներում գտնվող անշարժ գույքի գրանցման խնդիրների մասին և այլ առաջնահերթ խնդիրների շուրջ: Քննարկվեցին նաև համայնքում հողօգտագործման պահանջ ունեցող ընտանիքներին աջակցելու հետ կապված այլ հարցեր:
Արման Բաբաջանյանը ընդգծեց, որ սահմանազատման ու սահմանագծման աշխատանքները պետք է իրականացվեն միջազգային փորձի և համապատասխան իրավական գործիքներ ներդնելով, նա պարզաբանումներ տվեց բնակիչներին հուզող բազմաթիվ հարցերի, որոշ խնդիրների կապակցությամբ:
Արման Բաբաջանյանը ներկայացրեց «Հանուն Հանրապետության» կուսակցության առաքելությունը և ծավալած գործունեությունը: Անդրադարձ կատարվեց նաև Հայաստանի ներքին և արտաքին քաղաքական ներկա իրավիճակին: