ԱՄՆ պետքարտուղարի պաշտոնին առաջադրված Էնթոնի Բլինքենն ասել է, որ Բայդենի վարչակազմը վերանայելու է ամերիկյան անվտանգային աջակցությունն Ադրբեջանին։ Հաստատվելու դեպքում այն նոր թափ կհաղորդի ԱՄՆ ներգրավվածությանն այնպիսի մշտական լուծում գտնել, որը կապահովի Լեռնային Ղարաբաղի անվտանգությունը և կօգնի երաշխավորել, որ նոր պատերազմ չբռնկվի։
Ինչի՞ մասին է խոսում Էնթոնի Բլինքենի այս հայտարարությունը․ «Առաջին լրատվական»-ի հարցին պատմաբան Զոհրաբ Գևորգյանը պատասխանեց․ «Եթե ուշադրություն դարձնենք Բայդենի հրամաններին և այն առանցքային չեղարկումներին, որոնք ուղղված էին Թրամփի վարչակազմի դիրքորոշումներին, ապա կտեսնենք, որ պետքարտուղարի հայտարարությունը հենց դրա մեջ է մտնում։ Այսինքն՝ այն միտված է զարգացնելու այն տրամաբանությունը, որ ԱՄՆ-ն վերադառնում է որոշակի խաղի կանոններ դնողի դիրքերին։
Իսկ ինչ վերաբերում է մեր տարածաշրջանի նկատմամբ հետաքրքրությանը։ Աշխարհում, առհասարակ, կան առանցքային կետեր, որոնց վերաբերյալ երբեմն լինում են նաև տեղական կենտրոնացումներ։ Այնպես որ, կարծում եմ՝ սա շատ լավ ազդակ է տարածաշրջանում որոշակի հավասարակշռություն ապահովելու և կայունացում բերելու համար, այլապես մեկ ուժի կամ ոչ կոմպետենտ ուժերի տիրապետման պարագայում հղի է նաև ապագայում այդ երկրներում ներքաղաքական իրավիճակի տատանումներով։ Այն իր հետևից բերում է տարածաշրջանային անկայունության, որին ամերիկյան ներգրավումը դրական ազդեցություն կունենա»։
Մանրամասները՝ տեսանյութում։
