Դատարանի որոշմամբ` Ամատունի Վիրաբյանը կվերականգնվի Ազգային արխիվի տնօրենի պաշտոնում:
Այս առնչությամբ «Առաջին լրատվական»-ի հետ զրույցում Ամատունի Վիրաբյանը նշեց. «Դեմ մեկ ամիս ժամանակ կա և այդ ընթացքում նախարարությունը կարող է բողոքարկել դատարանի որոշումը և դա կարող է տևել ամիսներ, դրա համար ես այս պահին դեռ ոչինչ չեմ կարող ասել»:
Նա ընդգծեց, որ սա իր համար բարոյական խնդիր էր. «Ի սկզբանե ես գիտեի, որ վճիռն այդպես է լինելու, որովհետև ինձ ազատել էին մի պատճառով, որտեղ ես համարյա ոչ մի մեղք չունեի: Այնպես որ կապրենք կտեսնենք»:
Հարցին, թե եթե ամեն դեպքում բոլոր ատյաններում հաղթի, այս իշխանության հետ կշարունակի՞ աշխատել, Վիրաբյանը բացասական պատասխան տվեց. «Իհարկե, ոչ, Բադասյանի հետ ոչ: Բադասյանը մենակ չի, իհարկե: Հայաստանի ազգային արխիվի տնօրենի հարցը միայն Բադասյանով չի որոշվում»:
Ինչ վերաբերում է իրեն աշխատանքից ազատելու իրական պատճառներին, նա ասաց. «Ես չեմ կարող ասել՝ քաղաքական հաշվարկ էր, թե ինչ-որ մեկին աշխատանքի տեղավորելու խնդիր կար: Ինձ բացատրություն չեն տվել, ուղղակի հրամանը տվել են, որ դուք աշխատանքից ազատված եք: Դե ես 20 տարի աշխատել եմ, երևի նախկի իշխանության ներկայացուցիչ էին համարում: Նաև դպրոցական ծրագրերի հայեցակարգերի հարցերում դեմ եմ արտահայտվել նոր իշխանություններին: Հնարավոր է, որ դրանք պատճառ լինեն»:
Ամատունի Վիրաբյանը նաև նշեց, որ իր համար անակնկալ չէր իրեն ազատելու որոշումը. «Ես զգում էի, որ ցանկություն չկա ինձ հետ շարունակել աշխատել»: