Հայաստանում Վրաստանի դեսպան Թենգիզ Շարմանաշվիլին այսօր լրագրողների հետ հանդիպման ժամանակ խոսեց 2008 թվականի օգոստոսին տեղի ունեցած ռուս-վրացական պատերազմի մասին:
Նա նշեց, որ արդեն լրանում է պատերազմի երրորդ տարին, սակայն ընդգծեց, որ ռուսական ագրեսիան Վրաստանի նկատմամբ սկսվել է դեռևս 1990-ական թվականներին, և Վրաստանի անկախության ձգտումներին Մոսկվան պատասխանել է ռազմական աջակցություն ցույց տալով Վրաստանի երկու շրջանների՝ Աբխազիայի և Հարավային Օսիայի առանձին խմբավորումներին:
Դեսպանը նշեց, որ Ռուսաստանն անընդհատ խախտել է 90-ականներին ձեռք բերված խաղաղության համաձայնագիրը, ինչպես նաև ՄԱԿ-ի Անվտանգության խորհրդի կողմից Աբխազիայի իրավիճակի դրության վերաբերյալ ընդունված բանաձևը:
Դեսպանի գնահատմամբ՝ 1990-ական թվականներից Աբխազիայում և Հարավային Օսիայում տեղակայված ռուսական խաղաղապահ ուժերը պարտավորված էին պահպանել խաղաղ կայունությունն այդ տարածքներում, սակայն նրանք 15 տարիների ընթացքում կանխամտածված բարդացրել և լարել են իրավիճակը: Դեսպանը խոսեց նաև այն մասին, որ 2008 թվականի ապրիլից սկսած՝ Ռուսաստանը, առանց Վրաստանի իշխանությունների թույլտվության, ակտիվորեն զարգացրել է իր ռազմական ներկայությունը Աբխազիայում և Հարավային Օսիայում։ Աբխազիա է մտցրել երկաթգծային զինված ուժեր, իսկ Ցխինվալից ոչ հեռու տեղակայել է զրահատեխնիկա:
Հայաստանում Վրաստանի դեսպանը նկարագրեց 2008 թվականի օգոստոսի 1-ից սկսված ռուս-վրացական ռազմական գործողությունները՝ ընդգծելով, որ ռուսական զինված ուժերը ակտիվորեն ռմբակոծել են ոչ միայն վրացական խաղաղապահների դիրքերը, այլ նաև վրացական գյուղերը, որի հետևանքով անմեղ քաղաքացիներ են զոհվել: Դեսպանը տեղեկացրեց, որ օգոստոսյան պատերազմի հետևանքով վրացական կողմը 396 զոհ է տվել, իսկ 140 հազար վրացիներ ստիպված են եղել լքել իրենց տները և դառնալ ներքին տեղահանվածներ կամ փախստականներ:
Դեսպանը չկարողացավ նշել, թե 140 հազար տեղահանվածներից քանիսն են ընդհանրապես լքել երկիրը, սակայն ցավով արձանագրեց, որ Վրաստանում կա հատուկ նախարարություն, որը զբաղվում է հենց այս խնդրով, և այնտեղ կան հստակ թվերը:
