Ադրբեջանական Salam News գործակալության փոխանցմամբ՝ Թուրքիայում անցկացվող Բարձրագույն ռազմական խորհրդի (YAŞ) նիստի ժամանակ լարված իրավիճակ է ստեղծվել՝ կապված 14 թուրք գեներալների հետ, որոնք ձերբակալվել են 2003 թվականին պլանավորված Balyoz ռազմական հեղաշրջման գործի շրջանակներում։
Ակնկալվում էր, որ ձերբակալված 14 գեներալները պաշտոնաթող կլինեն, սակայն վերջին տեղեկատվության համաձայն՝ Գլխավոր շտաբի նորանշանակ պետի դիրքերի ամրագրման համար որոշվել է նրանց պաշտոնաթողության հարցը հետաձգել մեկ տարի ժամկետով՝ պահպանելով նրանց զինվորական կոչումները։
Ակնկալվում է, որ այսօր նորանշանակ Պաշտպանության նախարար Իսմեթ Յըլմազին ու Գլխավոր շտաբի պետի պաշտոնակատար Նեջդեթ Օզելին կհյուրընկալի Թուրքիայի նախագահ Աբդուլլահ Գյուլը, ով կծանոթանա YAŞ-ի ընդունած որոշումների հետ։ Գյուլի կողմից հաստատվելուց հետո հանրությունը կիրազեկվի այդ որոշումների մասին։
Հիշեցնենք, որ հուլիսի 29-ին հրաժարական էին տվել Թուրքիայի Գլխավոր շտաբի պետը, ցամաքային, ռազմաօդային ու ռազմածովային զորքերի հրամանատարները։
