Հանրային ու քաղաքական քննարկման օրակարգում Մոսկվայում տեղի ունեցած եռակողմ հանդիպումն է։
Մոսկովյան այդ հանդիպումը ցրե՞լ է ստեղծված իրավիճակի և մեր առանցքային հարցերի շուրջ անորոշությունը, թե՞ այն ավելի է խորացրել․ «Առաջին լրատվական»-ի հարցին ՀՀ արտակարգ և լիազոր դեսպան, Արցախի նախկին արտգործնախարար Արման Մելիքյանը պատասխանեց․ «Ցրվելու տպավորություն չկա, և բովանդակային առումով ևս մենք չենք կարող փաստել, թե այսօր, այս պահին Հայաստանի հանրությանն առաջնահերթ կերպով հետաքրքրող հարցերը երբ կլուծվեն, ինչպես կլուծվեն․ այն անհայտություն է, մշուշը պահպանվում է։ Այդ տեսանկյունից՝ այն արդյունքը, որը գրանցվել է և հրապարակվել է, որովհետև չեմ բացառում, որ կան այնպիսի պայմանավորվածություններ, որոնք հրապարակման ենթակա չեն եղել, որևէ կապ չունի այս պահին մարդկանց սպասելիքների հետ և վերաբերում է այն պահանջմունքներին, որոնք որ ունեն, թերևս, ավելի շատ Բաքուն ու Մոսկվան։ Այդ առումով, կարծում եմ՝ պատահական չէ, որ կա որոշակի հիասթափության զգացում, թեև կան մարդիկ, որոնք թեթևակի շունչ քաշեցին, քանի որ խիստ բացասական, Հայաստանի շահերին առերևույթ սպառնացող պայմանավորվածություն չի եղել և փաստաթուղթ չի ստորագրվել։
Բոլոր դեպքերում պրոցեսն ընթացքի մեջ է, տարածաշրջանում ճանապարհների տարանցիկ բացման խնդիր է լուծվելու, որի համար որոշակի ժամկետ է կրկին սահմանվել։ Այդ ժամկետները որոշակի առումով նաև հոգեբանորեն իրավիճակը հանդարտեցնելուն են միտված, թերևս հասկանալի է, որ ոչ քաղաքական խնդիր կա լուծված, ոչ իրականում պատերազմի խնդիրն է լուծված, ավարտված, ոչ էլ գերիների և անհետ կորածների խնդիրն է լուծված։ Այսինքն՝ մեզ համար անորոշությունը պահպանվում է»։
Արման Մելիքյանի դիտարկմամբ՝ անհրաժեշտություն կա, որ իշխանափոխություն տեղի ունենա: Նրա խոսքով՝ քաղաքական վերնախավը կորցրել է վստահությունը: «Իշխանափոխությունը ներքաղաքական իրավիճակի բարելավանն ուղղված կարևորագույն քայլերից մեկն է: Իշխանափոխությունը պետք է արագացնի նոր անվտանգային միջավայրին հարմարվելու Հայաստանի ունակությունը պետական մակարդակում»,- նշեց Մելիքյանը:
Մանրամասները՝ տեսանյութում։
