ԱՄՆ-ի պետքարտուղար Մայք Պոմպեոն հաստատել է «Անսար Ալլա» եմենական շարժումը (հուսիթներ) օտարերկրյա ահաբեկչական կազմակերպություն հայտարարելու մտադրությունը: Այդ մասին ասվում է մամուլի տեղեկագրում, որը հրապարակվել է ամերիկյան պետդեպարտամենտի կայքում: Ավելի վաղ Reuters գործակալությունը, վկայակոչելով աղբյուրների, հաղորդել էր «Անսար Ալլա» եմենական շարժումն ահաբեկչական կազմակերպություն հայտարարելու ԱՄՆ-ի պլանների մասին, դրա հետ մեկտեղ նշվել է, որ վարչակազմն այդ քայլին կարող է գնալ արդեն հունվարի 11-ին: «Պետդեպարտամենտը Կոնգրեսին կծանուցի «Անսար Ալլա» (շարժումը) օտարերկրյա ահաբեկչական կազմակերպություն հայտարարելու իմ մտադրության մասին»,- մամուլի տեղեկագրում մեջբերվում են Պոմպեոյի խոսքերը: Նաև նշվում է, որ ահաբեկիչների ցուցակում կընդգրկվեն շարժման երեք առաջնորդներ:
Պոմպեոյի խոսքով՝ այս միջոցները «լրացուցիչ գործիքներ են Իրանի կողմից աջակցվող «Անսար Ալլա»-ի ահաբեկչական գործունեությանը հակազդելու համար: Նա հավելել է, որ այս որոշումն ուղղված է «խաղաղ, ինքնիշխան և միասնական Եմենի հասնելու ուղղությամբ ջանքերի առաջմղմանը, որն ազատ է իրանական միջամտությունից և խաղաղության մեջ է իր հարևաննների հետ»:
«ԱՄՆ-ի նախագահ Դոնալդ Թրամփի վարչակազմի նման պլանների մասին նոյեմբերին հաղորդել էր Foreign Policy հրատարակությունը: Այս քայլը, գրում է հրատարակությունը, սպառնում է խարխլել Եմենին օգնություն ցուցաբերելու ուղղությամբ միջազգային ջանքերը, ինչպես նաև ՄԱԿ-ի միջնորդությամբ երկրում խաղաղ կարգավորման ջանքերը: Այնուհետև ահաբեկչությանը հակազդելու հարցերով զբաղվող ԱՄՆ-ի համակարգող Նաթան Սեյլսը հայտարարել է, որ իշխանությունները նախօրոք չեն հաղորդելու եմենական շարժումն ահաբեկչական կազմակերպություն ճանաչելու մասին:
2014 թվականի օգոստոսից Եմենում շարունակվում է դիմակայությունը կառավարական ուժերի ու երկրում իշխանությունը վերցրած հուսիթների միջև: Այն առավել ակտիվ փուլ է անցել 2015 թվականի մարտին կոալիցիայի ներխուժումից հետո, որը գլխավորում է Սաուդյան Արաբիան: Եմենի Իրավունքի ու զարգացման կենտրոնների տվյալների համաձայն՝ 2015 թվականի գարնանից Եմենում սպանվել են 10 հազարից ավելի խաղաղ բնակիչներ, այդ թվում՝ գրեթե 2,4 հազար երեխաներ և շուրջ 2 հազար կանայք։
