Մենք պետք է կարողանանք ստեղծել ժամանակակից բանակ: Այս մասին «Առաջին լրատվական»-ի հետ զրույցում նշեց ԱՊՀ երկրների սահմանապահ զորքերի հրամանատարների խորհրդի անդամ, գեներալ-մայոր Լևոն Ստեփանյանը:
«Երևի կառուցվածքային վերափոխումներ պետք է լինեն, զինատեսակների փոփոխություններ լինեն, երևի մենք պետք է արդեն խելքի գանք, իսկապես հստակեցնենք մեր հետագա քայլերը, որպեսզի ստեղծենք ժամանակակից բանակ: Այն խոսակցությունները, որ մեր ժողովրդի մեջ հիմա տարածվում են, դրանք մտահոգում են մեզ բոլորիս, ես ցավում եմ, որ այսօր խոսակցություններ կան, որ հայաստանցին չպետք է ծառայի Արցախում: Արցախին ձայներ են հնչում, որ ՀՀ վարչապետը չպետք է ինչ-որ որոշումնեռր կայացնի Ղարաբաղի հետ կապված, կամ Ղարաբաղի ղեկավարությունը չպետք է պահանջի ՀՀ վարչապետի հրաժարականը: Դրանք բերում են հակասությունների, մեր ազգի պառակտման: Իմ պատկերացմամբ, պառակտված հասարակությունը չի կարող ունենալ հզոր բանակ»,-ասաց նա: Հարցին, թե որոնք էին մեր պարտության պատճառները, գեներալմայորը պատասխանեց. «Երևի ճշմարիտ են մեղադրանքները, որ բանակը պատրաստ չէր: Ես չընդունելով վարչապետ Նիկոլ Փաշինյանի դիրքը, երկու տարվա նրա գործունեությունը, բայց միաժամանակ նա չէ միակ մեղավորը»:
