Գերիների վերադարձի շուրջ անորոշ իրավիճակը շարունակվում է՝ հանգուցալուծումը դեռ մշուշոտ է։
Ադրբեջանի նախագահ Իլհամ Ալիևը հայտարարություն տարածեց և նշեց, որ իրենց մոտ գտնվող հայ զինծառայողները ռազմագերիներ չեն, այլ հանցագործներ, ահաբեկիչներ են, և նրանք պահվում են բանտերում։ Արդյո՞ք սա նշանակում է, որ մեր գերիների վերադարձն առնվազն ձգձգվելու է․ «Առաջին լրատվական»-ի հարցին իրավապաշտպան Ժաննա Ալեքսանյանը պատասխանեց․ «Որ ձգձգվելու է՝ միանշանակ է։ Գերիների փոխանակումը միշտ էլ դժվար է եղել, բայց այս իրավիճակը մի քիչ այլ է։ Այստեղ Ռուսաստանը միջնորդի դերում է հանդես գալիս, բայց մենք տեսնում ենք, որ իրավիճակի տերն Ադրբեջանն է։ Նա է որոշում, թե որ տարածքները մեզնից վերցնել՝ ինչ նրանք ուզում են, դրան հասնում են։
Ինչ վերաբերում է Խծաբերդում գերի ընկածներին, ապա պետք է ասեմ, որ մինչ այժմ չգիտենք, թե ինչպես են մեր զինված կամավորները հայտնվել գերության մեջ։ Իշխանությունները հարկ չեն համարում հանրությանը բացատրել, երբ իրոք անհանգստանում ես։ Ես չեմ հավատում, որ լինի մարդ, որը չանհանգստանա։ Մենք ուզում ենք իմանալ, թե ինչ է եղել, ինչպես է եղել։ Եվ հիմա Ադրբեջանի այդ կեցվածքը շատ ընդգծված է մեր թույլ իշխանությունների առջև, որոնց պահանջները նույնիսկ մենք չենք լսում։ Ես լսում եմ մեռած ելույթներ, այն դեպքում, որ պետք է պահանջ ներկայացնել, հստակեցնել, շեշտել, ընդգծել։ Մենք միայն գիտենք, որ Արտակ Զեյնալյանը դիմում է Եվրախորհրդին ու նրա դիմումներն ընդունում ու կիրառում են, իսկ հետո Ադրբեջանը սկսում է տալ կամ չտալ։ Բացի դրանից՝ մեր գերիներին ահաբեկիչներ հայտարարելուց հետո մենք չենք տեսնում, որ Ռուսաստանը հանդես գա մեր օգտին»։
Մանրամասները՝ տեսանյութում։