«Երեկվա հանրահավաքում ոչ այնքան կարևոր էին ելույթների բովանդակությունը, այլ այն մարդկանց քանակի ստուգատես էր»,- «Առաջին լրատվականի» հետ զրույցում գնահատելով Հայ ազգային կոնգրեսի երեկվա հանրահավաքը կարծիք հայտնեց քաղտեխնոլոգ Արմեն Բադալյանը:
Նրա գնահատմամբ՝ չնայած հանրահավաքը օգոստոսի 2-ին էր, երբ բավականին քանակությամբ մարդիկ գնացել են հանգստանալու, հանրահավաքի մասին իրազեկումը ՀԱԿ կողմից այդքան էլ ակտիվորեն չի իրականացվել, բավականին մարդ էր եկել, ինչն էլ ցույց տվեց, որ բանակցային գործընթաց սկսելով՝ ՀԱԿ-ն իր ընտրազանգվածի մոտ վարկանիշի կորուստ չի ունեցել:
«Չնայած ՀԱԿ-ին քննադատում են իշխանությունների հետ երկխոսություն սկսելու համար, բոլորը նշում են, թե նրա վարկանիշը ընկել է, որ ՀԱԿ-ը գործարքի է գնացել, երեկվա հանրահավաքն ամբողջությամբ հերքեց այդ ամենը, և դա էր ամենակարևորը»,- ընդգծեց Բադալյանը և հավելեց, որ երեկվա հանրահավաքում հավաքվածները շատ լավ հասկանում էին, որ այդ հանրահավաքը հիմնականում ուժի ցուցադրում էր և էական ազդեցություն քաղաքական գործընթացների վրա չի ունենա: Բադալյանի գնահատմամբ՝ բանակցային գործընթացն սկսելուց հետո երեկվա հանրահավաքն առաջինն էր, և ՀԱԿ-ը կարիք ուներ ցույց տալու, որ կարող է ավելի կոշտ և խիստ լինել բանակցությունների ընթացքում, և դա կախված էր մարդկանց քանակից.
«Եթե մի շարք բացասական գործոնները հաշվի առնելով՝ երեկ այդքան մարդ էր եկել հանրահավաքին, ապա դա նշանակում է, որ ՀԱԿ-ը կարող է անել այն, ինչի մասին խոսում են ՀԱԿ-ի ղեկավարները՝ եթե մինչև օգոստոսի վերջ արդյունք չլինի, աշնանը կգնան առճակատման: Հանրահավաքի մարդաշատությունը ցույց տվեց, որ եթե հիմա է այդքան մարդ հավաքվել, ապա աշնանն էլ ավելի շատ մարդ է գալու, և առճակատումը կարող է կայանալ»:
Քաղտեխնոլոգի խոսքերով՝ երեկվա ստուգատեսը ՀԱԿ-ն անցել է:
