Երևանի քաղաքապետարանը հայտարարել է, որ ձեռնարկել է նախագծել տրանսպորտի միասնական նոր ցանց, ինչը դեռևս ընթացքում են։ Քաղաքապետարանի կայքի համաձայն՝ դրանով մասնավորապես նախատեսվում է զգալիորեն թարմացնել հասարակական տրանսպորտի շարժակազմը:
«Առաջին լրատվականի» հետ զրույցում Երևանի նախկին քաղաքապետ Վահագն Խաչատրյանը նշեց, որ կարևորագույն հարցն ավտոբուսների խնդիրն է, ու կարծես քաղաքապետարանն էլ է գնում դրան՝ միկրոավտոբուսները փոխարինել մեծ ավտոբուսներով:
Վ.Խաչատրյանի խոսքով՝ պարտադիր պետք է հաշվի առնել մետրոյի հանգամանքը: 2009 թ. ավագանու ընտրությունների ժամանակ խոստումներ էին տալիս մետրոյի նոր 2 կայարանների կառուցման վերաբերյալ, սակայն ոչինչ չեն արել: «Առանց դրա՝ Երևանի տրանսպորտի հարցը լուծել չի լինի»,- ասաց Վ.Խաչատրյանը:
Նախկին քաղաքապետը մատնանշեց վրացիների օրինակը, ովքեր Թբիլիսիում շատ արագ լուծել են տրանսպորտային խնդիրները, երթուղայիներն այժմ աշխատում են միայն այն վայրերում, ուր մեծ ավտոբուսները ֆիզիկապես չեն կարող մուտք գործել:
Վ.Խաչատրյանի գնահատականով՝ խնդիրը բիզնեսն է և այն գերշահույթները, որ ապահովում են երթուղային տաքսիները. «Իրավիճակը փոխելու համար այժմ ինչ-որ մարդիկ պետք է դուրս գան այդ բիզնեսից: Դա է եղել պատճառը, որ տարիներ շարունակ այդ խնդիրը չի լուծվել, և ոչ թե այն, որ ֆինանսական միջոցների բացակայության պատճառով ավտոբուսներ չեն ներկրվել: Հիմա, հնարավոր է, բիզնեսի խոշորացում են ուզում անել»:
Վ.Խաչատրյանի կարծիքով՝ ընդհանրապես մի հանգամանք պետք է հաշվի առնել՝ դոտացիայի խնդիրը: Առանց դոտացիայի հնարավոր չէ հասարակական տրանսպորտի աշխատանքը:
Ընդ որում, տնտեսագետը խիստ կարևորեց քաղաքային ցանկացած հարցի լուծումը քաղաքացիների հետ քննարկելը. «Ինչքան էլ մասնագետները հաշվարկեն, քաղաքացիներն են օգտվելու տրանսպորտից, իսկ միայն հաշվարկների արդյունքում հնարավոր է՝ ունենանք ոչ արդյունավետ ցանց»:
