«Առաջին լրատվական»-ի զրուցակիցն է Սփյուռքի գործերի գլխավոր հանձնակատար Զարեհ Սինանյանը:
– Պարոն Սինանյան, Սփյուռքի տարբեր կառույցներ պահանջում են վարչապետի հրաժարականը, սակայն հիմնականում դաշնակցական կառույցներն են, որոնք ամբողջ Սփյուռքի անունից են տարածում այդպիսի հայտարարություններ։ Ի՞նչ աշխատանքներ եք իրականացնում Սփյուռքին շոկից դուրս բերելու համար, և ինչպե՞ս է Սփյուռքը մասնակցելու Հայաստանին շոկից դուրս բերելու գործընթացին։
– Մենք շարունակում ենք աշխատանքները համայնքների հետ, որոշ համայնքների հետ ավելի սերտորեն ենք աշխատում, քան այլոց հետ։ Շատ ճիշտ նկատեցիք, որ այդ հրաժարականի կոչերը Սփյուռքից հիմնականում առնչվում են կոնկրետ մեկ կուսակցության հետ, որը նախորդ ռեժիմի բաղկացուցիչ մասն է կազմել։ Եվ այդ կոչերն էլ ամբողջ Սփյուռքի անունից են հնչեցնում։ Իսկ մենք աշխատում ենք բոլոր համայնքների այն շերտերի, այն կազմակերպությունների հետ, որոնք շարունակում են աշխատել հայրենիքի հետ, օգտակար աշխատանք իրականացնել, իսկ աշխատանքը հիմա շատ ավելի շատ է, քան երբևէ։
– Հայաստանն այս շոկից դուրս բերելու ինչպիսի՞ մեխանիզմներ են Սփյուռքից առաջարկում։ Արդյոք դիմո՞ւմ են իրենց առաջարկներով, ինչպե՞ս են պատրաստ աջակցել։
– Առաջարկներով չեն դիմել։ Այդ մի խումբը, որը կոնկրետ կուսակցական շահի հետ է առնչվում, իրենց առաջարկածը հրաժարականն է, դրանից այն կողմ չի գնում, հրաժարական, որից հետո իրենք նորից պետք է վերադառնան, իհարկե, մարդիկ քսան տարի դրա հետևանքները տեսել են։ Իսկ իրականում Սփյուռքը գտնվում է խորը շոկի մեջ, ինչպես ամբողջ հայ ազգը։ Եվ դեռ կարծես չենք կարողանում այդ շոկային իրավիճակից դուրս գալ։
– Հայաստանի և աշխարհի մի քանի տասնյակ հայ գիտնականներ պահանջում են Փաշինյանի անհապաղ հրաժարականը, որից հետո պատրաստակամ են օգնել հայրենիքի զարգացմանը։
– Ես նախ պետք է տեսնեմ այդ գիտնականների ցանկը, հայտարարությունը, որից հետո նոր կկարողանամ պատասխանել։
– Գիտնականների ցուցակ չկա։
– Ուրեմն արհամարհում եմ այդպիսի հայտարարությունը։
– Հայաստանին այս շոկից դուրս բերելու գործում Սփյուռքը ի՞նչ դերակատարություն պետք է ունենա։
– Այս պահին, ինչպես Հայաստանում, այնպես էլ Սփյուռքում, պետք է բոլորը սթափվեն, խորը շունչ քաշեն, հասկանան՝ ինչպիսի օրհասական պատմական պահ ենք ապրում, և յուրաքանչյուրը ինչպես կարող է իր մասով մասնակից լինել այս իրավիճակից դուրս գալուն։ Իսկ այս պահին և՛ ներքին, և՛ արտաքին թշնամիների կողմից տարածվող միմիայն բացասական ինֆորմացիայով է մամուլը ողողված, որի նպատակն էլ այս շոկային իրավիճակն ավելի խորացնելն է, փլուզումը և կորուստները ավելի խորացնելը։ Բնական է, որ երկուսն էլ նպատակներ ունեն, առաջինի թիվ մեկ նպատակն է, որ հնարավորինս շատ մարդ լքի Հայաստանը և ավելի շատ վնաս հասցնել, իսկ մյուսների նպատակն է այս ամենը օգտագործել, որպեսզի վերադառնան իշխանության։
Սփյուռքում շատ են նաև այնպիսիք, որոնք կուսակցական չեն, անհատներ են, որոնք պարզապես անհանգստացած են Հայաստանի ճակատագրով և հետին նպատակներ չունեն։ Երբ նրանց հետ մի փոքր զրուցում ես, ասում ես՝ լավ, հրաժարականը կարող է հարցի լուծման մի տարր լինել, հրաժարական, որից հետո վակուում է ստեղծվում, որն անմիջապես պետք է լցվի, և կարևոր է, որ այդ վակուումը լցնեն մարդիկ, որոնք ավելի լավն են, քան նախորդները։
– Նկատի ունեք Դաշնակցությո՞ւնն է հիմնականում իր կառույցներով նման հայտարարություններ տարածում։
– Կարիք չկա անուններ տալու, բոլորի համար էլ պարզ է՝ ովքեր են։
