Մեծ Բրիտանիայի կառավարությունը Լոնդոնում մտցրել է առավել խիստ սահմանափակումներ՝ COVID-19-ի դեպքերի աճով պայմանավորված: ՏԱՍՍ գործակալությունը տեղեկացնում է, որ այս մասին հայտարարել է Մեծ Բրիտանիայի առողջապահության նախարար Մեթ Հենքոքը: Նա տեղեկացրել է նաև Անգլիայի հարավում ի հայտ եկած նոր տիպի կորոնավիրուսի մասին:
«Վերջին մեկ շաբաթվա ընթացքում մեր դիտարկումները ցույց են տալիս, որ կորոնավիրուսի զգալի աճ է նկատվում Լոնդոնում, Կենտում: Մենք չգիտենք, թե դա որքանով կապ ունի վիրուսի նոր տարբերակի հետ: Ամեն դեպքում պատճառները ինչ էլ լինեն, անհրաժեշտ է, որ մենք շտապ վճռական միջոցներ ձեռնարկենք»,-ասել է նախարարը:
Նա տեղեկացրել է, որ կորոնավիրուսային հիվանդությունը, որը նախկինում մեծ տարածում էր գտել դպրոցականների շրջանում, այժմ դա նկատվում է ավելի մեծ տարիքային խմբերում: Մեծ Բրիտանիայում կորոնավիրուսի թվերի ավելացումը լուրջ մտահոգում է, բուժհաստատություններին սպառնում է գերծանրաբեռնվածություն:
Դեկտեմբերի 16-ից չեն գործելու սրճարանները, ռեստորանները, հյուրանոցներն ու կինոթատրոնները: Դպրոցներն ու խանութներն առայժմ կարող են շարունակել իրենց գործունեությունը:
