Հունաստանի ոստիկանության և անվտանգության վարչությունը Հռոդոս կղզում ձերբակալել է երկու հույնի՝ Թուրքիայի օգտին լրտեսություն կատարելու համար: Այդ մասին շաբաթ օրը հաղորդել է Հունաստանի պետական հեռուստատեսությունը՝ վկայակոչելով իրավապահ մարմինների տեղեկատվությունը: Տեղեկացնում է ՏԱՍՍ-ը
Ըստ նրանց, Ատտիկայի կենտրոնական շրջանի անվտանգության վարչությունը քրեական գործ է հարուցել տեղի երկու բնակչի դեմ Քրեական օրենսգրքի 148 հոդվածի (լրտեսություն) և 376/1936 օրենքի (հաստատված դիրքերի նկատմամբ անվտանգության միջոցառումների մասին) խախտման համար: Հաղորդվում է, որ ձերբակալվածներից մեկը աշխատում էր լաստանավի վրա, որը Հռոդոսը կապում է Կաստելորիզո կղզու հետ, իսկ մյուսը՝ Հռոդոսի հյուպատոսական կետում:
Հետաքննությունն անցկացրել է ոստիկանությունը՝ Ազգային հետախուզական ծառայության և Հռոդոսի անվտանգության վարչության հետ սերտ համագործակցությամբ:
«Էթնոս» թերթը հայտնում է, որ ձերբակալվածներից մեկը լուսանկարել է հունական ռազմանավերը և լուսանկարներն ուղարկել իր հանցակցին՝ Հռոդոսում Թուրքիայի հյուպատոսության մի աշխատակցի: Նա նույնպես ձերբակալված է: