Ընդդիմությունը պահանջում է վարչապետի հրաժարականը, բայց հրապարակները չեն լցվում հասարակության կրիտիկական զանգվածով, ինչպես եղավ 2018-ին, և որը բերեց թավշյա հեղափոխության: Ինչո՞ւ չեն լցվում հրապարակները: «Առաջին լրատվական»-ի հետ զրույցում, անդրադառնալով այս հարցին, բեմադրող ռեժիսոր Սուրեն Շահվերդյանը նշեց, որ իր կարծիքով՝ դեռ երկար ժամանակ չեն լցվի հրապարակները, քանի որ ժողովուրդը հիասթփված է:
«Ամենադաժան և ցավալի իրականությունն ինձ համար այն է, որ մեր ժողովրդին 2,5 տարի առաջ միավորեց ատելությունը, մերժելը: Եվ հիմա նույն գործիքակազմն է կիրառվում: Մարդկանց փորձում են միախմբել ատելության շուրջ, և ընդամենը խնդիրը լինի գահընկեց անելը:
Նիկոլ Փաշինյանը չկարողացավ լուծել նվազագույն խնդիրը՝ նա չկարողացավ փոխել այն համակարգը, որում ապրում էինք: Նիկոլ Փաշինյանին փոխեց համակարգը, որում նա հայտնվեց:
Ժամանակին ես աջակցում էի և հավատում էի Նիկոլ Փաշինյանին, բայց հիասթափվեցի: Նա ազնիվ չգտնվեց և իր «լայվերում» չանդրադարձավ Արցախի խնդրին՝ չասաց, որ այսպիսի անլուծելի խնդրի առաջ ենք»,- նշեց Շահվերդյանը:
Անդրադառնալով ընդդիմության գործունեությանը՝ Սուրեն Շահվերդյանը նկատեց. «Այդ 17-ից մեկին հարց տաս, թե ինչպես է տեսնում Հայաստանի ապագան, ինչ է լինելու մեզ հետ, կա՛մ պատասխան չի ունենա, կամ անհեթեթ պատասխան կտա: Միայն խոստումներ են հնչեցնում, որոնք անհնար է իրականացնել, խաբում են ու խաբում»:
Սուրեն Շահվերդյանի դիտարկմամբ՝ Հայաստանում միակ կայացած ինստիտուտը մարդկանց փչացնելու ինստիտուտն է:
Մանրամասները՝ տեսանյութում:
