«Այն պատգամավորները, ովքեր խմբակցությունն են լքում կամ մանդատն են վայր դնում, ինչ-որ տեղ հասկանալի է, նրանք փորձում են իրենց ուժերը ներդնել այլ բնագավառում։ Իսկ նրանք, ովքեր մանդատը վայր չեն դնում և պատգամավոր են դարձել քաղաքական ուժի շնորհիվ, ես դա համարում եմ շատ ամոթ երևույթ։ Փաստորեն, ինչպես ժողովուրդն է ասում՝ պարտությունը որբ է, իսկ հաղթանակն ունի հազար տեր»,-լրագրողների հետ զրույցում ասաց «Իմ քայլը» խմբակցության պատգամավոր Արմեն Խաչատրյանը։
Նրա խոսքով՝ եթե այլ իրավիճակ լիներ ռազմի դաշտում, ապա այդ պատգամավորները վայր չէին դնի իրենց մանդատները, ավելին՝ կգովաբանեին, հեքիաթներ կհորինեին իրենց արած-չարածի վերաբերյալ.«Երբ դժվար իրավիճակներ են լինում և այդ ժամանակ նման մարդիկ ասում են, թե մենք միայն լավ իրավիճակների ընկեր ենք, ապա նման ընկեր չի լինում»:
