Պատերազմի 44 օրերի ընթացքում մեր կազմակերպությունը տարբեր տեսակի օգնություն է հասցրել Արցախ: Այս մասին «Առաջին լրատվական»-ի հետ զրույցում ասաց «Հայերի աջակցության թիմ» բարեգործական կազմակերպության ղեկավար և լրագրող Ռոման Բաղդասարյանը: «Չգիտեմ ինչու, այդ օգնությունը չէին ուզում Ստեփանակերտից շուտ հասցնել սահման: Պատճառներից էր այն, որ մեծ մասը վախենում էր Ստեփանակերտից մեքենայով հասնել սահման, նկատելի էր նաև անտարբերություն: Եվ մենք որոշեցինք, որ մեր հավաքած օգնությունը, օրինակ՝ դեղերը, մենք տանենք հասցնենք դիրքեր»:
Մեր զրուցակիցը զարմացած էր՝ այդ ինչպե՞ս է, որ ՌԴ հայերի 25 տոկոսը գիշերները չքնելով և գումար հավաքելով օգնությունը ինքնաթիռով հասցնում էր Երևան, Երևանից՝ Ստեփանակերտ, իսկ Ստեփանակերտից չէին ուզում հասցնել սահման. «90 տոկոս պատճառը վախն էր. վախենում էին, որ այդ անօդաչուն կարող է իրենց խփի, սպանի: ՊՆ-ին պետք է հարց տալ՝ իմ ընկերը կոնկրետ 6 արկղ ակնոց է տվել պաշտպանության նախարարությանը ու երկու շաբաթ առաջ կռվով, սկանդալով հետ է վերցրել այդ արկղերը, ու իրենք հետ են տվել մեկ արկղ պակաս»:
Անդրադառնալով բացթողումներին և տեղի ունեցածի պատճառներին՝ Ռոման Բաղդասարյանը նշեց. «Առաջին հերթին պատճառը մեր ազգի անտարբերությունն է. իրենց համար միևնույն էր, որ մեր զինվորը 44 օր կանգնած է սահմանին, և նրա նասկին արդեն կպել է ոտքին: Ես Հադրութից եմ, որը հրաշալի ժողովուրդ ունի, բայց ես մինչև հիմա չեմ հասկանում՝ ինչպես կարող է Արցախի ղեկավարությունն այդքան անտարբեր լինել, որի մեծամասնությունը փախել է Երևան: Արցախի կառավարության մեծամասնությունը թողել է մեր զինվորներին մենակ ու փախել, դրա համար էլ նրանցից որևէ մեկը, որևէ մեկի եղբայրը, որդին չեն մահացել. այդ ո՞նց ստացվեց: Բացի դրանից, էդ ո՞նց է ստացվել, որ ոչ ոք չի մահացել Գագիկ Ծառուկյանի խմբից, ոչ ոք չի մահացել Վանեցյանի խմբից, միայն մահացան Ջալալ Հարությունյանի տեղակալները, և վիրավորվեց Ջալալը: Ես չեմ խոսում Փաշինյանի դեմ կամ հօգուտ նրա, ես հասարակ հարց եմ տալիս»:
Առավել մանրամասն՝ տեսանյութում:
