Հայաստանում ներքաղաքական մթնոլորտը դեպրեսիվ է, ինչը տրամաբանական է այս մասշտաբի պարտությունից հետո: Անշուշտ, ամենաթեժ հարցը հայ գերիների և անհետ կորածների հարցն է: «Առաջին լրատվական»-ի հետ զրույցում այս մասին ասաց վերլուծաբան Արեգ Քոչինյանը:
«Եթե հայկական կողմը կատարում է իր պարտավորությունները, ապա հայտարարության միջնորդ կողմը պարտավոր է հետևել, որ մյուս կողմը նույնպես կատարի իր պարտավորությունները»,- նշեց վերլուծաբանը՝ հավելելով, որ երբ հասարակությունը դուրս գա խոր դեպրեսիայից, որում հայտնվել է, մթնոլորտը շատ ավելի թեժ է լինելու:
ՀԱԿ իրավական հանձնաժողովի ներկայացուցիչ Արմեն Խաչատրյանի խոսքով՝ ստորագրված փաստաթուղթը եռակողմ համաձայնություն է, թեև ասվում է, որ այն հայտարարություն է: «Եվ այդ տեքստում գերիների և դիերի փոխանակման հստակ ժամկետները բացակայում են: Հայտնի է, որ կա վեճ՝ կապված համաձայնագրի 8-րդ կետի հետ, խոսքը վերաբերում է ռազմագերիներին, պահվող անձանց և պատանդներին: Պետք է ակտիվ դիվանագիտական ջանքերով և ԿԽՄԿ-ի հետ աշխատելով՝ հասնել 8-րդ կետի կատարմանը»: Արմեն Խաչատրյանի դիտարկմամբ՝ հայտնի չէ, թե պետական ինստիտուտները գործում են, թե ոչ այդ ուղղությամբ: Դրանով պետք է զբաղվի արդարադատության նախարարությունը, ՄԻՊ-ը, ԱԳՆ-ն»:
Արեգ Քոչինյանը հավելեց, որ Հայաստանի պետական ինստիտուտները կաթվածահար վիճակում են և հարց է առաջանում՝ ՀՀ ԱԳՆ-ն գերիների հարցով ունա՞կ է զբաղվել, թե՞ ոչ:
Վերլուծաբանի դիտարկմամբ՝ այս պատերազմի պարտության պատճառները բազմաթիվ են. «Սա կոմպլեքս խնդիր է, ինչպես որ մեր ինստիտուտները իրենց չարդարացրեցին պատերազմական իրավիճակում և կոլապսի ենթարկվեցին, այնպես էլ անհատներն ունեցան իրենց բախտորոշ դերն այս պարտության մեջ, կային և՛ ներքին, և՛ արտաքին պատճառներ: Տեղի է ունեցել ռուս-թուրքական խոշոր առևտուր՝ Լիբիա-Սիրիա-Լեռնային Ղարաբաղ մասշտաբի»,- նշեց Քոչինյանը:
Մանրամասն՝ տեսանյութում:
