Ադրբեջանի նախագահ Իլհամ Ալիևն առաջարկել է Նախիջևանը երկրի արևմտյան կողմին կապող միջանցք ստեղծել: «Մենք Նախիջևանը դուրս ենք բերում շրջապատումից՝ միևնույն ժամանակ բացելով նոր տրանսպորտային զարկերակ: Կարող եմ ասել, որ դրանից միայն կշահեն բոլոր երկրները»,- ասել է Ալիևը ժողովրդին հղած իր ուղերձում:
Նա ավելացրել է, որ Ռուսաստանը, Թուրքիան, Իրանը և Հայաստանը կկարողանան միանալ նոր միջանցքին:
Նրա դիտարկմամբ՝ այդ կերպ տարածաշրջանում հնարավոր կլինի ստեղծել համագործակցության հնգակողմ պլատֆորմ. «Ես այդ գաղափարն արդեն իսկ առաջարկել եմ ՌԴ և Թուրքիայի նախագահներին, նրանք դրական են վերաբերվել այդ գաղափարին։ Մենք ցանկանում ենք, որ տարածաշրջանում երկարատև խաղաղություն հաստատվի»։
Ալիևը նաև ցանկանում է նոր Լաչինի միջանցք ստեղծել։ Այժմյան միջանցքը կապում է Երևանն ու Ստեփանակերտը և Լաչինի միջոցով անցնում է այլ քաղաքներով։
Արցախի նախագահ Արայիկ Հարությունյանի՝ արտաքին հարաբերությունների գծով խորհրդական Դավիթ Բաբայանն «Առաջին լրատվական»-ի հետ զրույցում անդրադառնալով այս հայտարարություններին՝ նշեց. «Ինչքան ես գիտեմ՝ նոյեմբերի 9-ի պայմանագրի շրջանակներում Ադրբեջանն իրավունք ունի տրանզիտային կապ ունենալ Նախիջևանի հետ, թեպետ այդ կապը նրանք երբեք չեն խզել, Իրանի տարածքով աշխատել է։ Սա փաստորեն պատերազմի հետևանքն է, բայց դա չի նշանակում, որ Ադրբեջանը այդ միջանցքի նկատմամբ սուվերենություն կունենա»։
Ինչ վերաբերում է Լաչինի միջանցքին, մեր զրուցակիցն ասաց. «Այդ շնչերակը միակն է, որ կապում է Արցախը Մայր Հայաստանի ու արտաքին աշխարհի հետ։ Մի քանի տարում նոր ճանապահ պետք է կառուցվի, որը կշրջանցի Շուշին, որ Բերձորով Ստեփանակերտ կապը կայուն լինի։ Սա անվտանգության խնդիր է, խաղաղության հաստատման համար է։ Տեսնենք՝ ինչպես են զարգանում իրադարձությունները, պետք է հետևողական լինել»։
Մեր զրուցակիցը հորդորեց քաղաքական երանգներ չհաղորդել. «Աշխարհաքաղաքական նպատակների պատրվակով ճանապարհների կառուցումն անթույլատրելի եմ համարում։ Անվտանգությունը բխում է տարածաշրջանի բոլոր երկրների շահերից»։
Իրանագետները մինչդեռ պնդում են, որ Հայաստանի տարածքով թուրքին ճանապարհ տրամադրելը ձեռք բերված համաձայնագրի ամենավտանգավոր կետն է ու այս ուղղությամբ պետք է աշխատանք տանել հենց Իրանի հետ։ Իրանագետ Էմմա Բեգիջանյանը մեզ հետ զրույցում կարծիք հայտնեց. «Իրանի հետ մեր համագործակցության առաջին կետը պետք է լինի այդ միջանցքը Ադրբեջանին ու Թուրքիային չտրամադրելը։ Դրանից թուրքերը մեծ օգուտ են քաղելու, որովհետև ստիպված էին տարանցիկ ճանապարհով գնալ, իսկ հիմա՝ անվճար»։