ԱԺ ՀՅԴ խմբակցության պատգամավոր Լիլիթ Գալստյանը չի բացառում, որ աշնանը կանցկացվեն արտահերթ խորհրդարանական ընտրություններ, ինչպես պահանջում է ՀԱԿ-ը։ «Քաղաքականության մեջ ֆորս մաժորային իրավիճակները երբեք բացառելի չեն»,- ասում է Լիլիթ Գալստյանը։ Իսկ հարցին, թե պատրա՞ստ է արդյոք Դաշնակցությունը ընտրություններին և կարո՞ղ է կարճ ժամանակահատվածում հաջողության հասնել էլեկտորատին գրավելու հարցում, ՀՅԴ պատգամավորը պատասխանեց.
«Ընտրական գործընթացները մեզ համար նորություն չեն։ Ետխորհրդային անկախության քսան տարիների ընթացքում Դաշնակցությունը մասնակցել է համապետական բոլոր ընտրություններին և ներկայություն է ապահովել բոլոր գումարման խորհրդարաններում։ Այնպես որ, արտահերթ ընտրությունների հանգամանքը չի կարող մեզ ցայտնոտի մատնել»։
«Բայց մեր, կարծում եմ նաև ողջ հասարակության համար խնդիրը ոչ այնքան կամ բոլորովին էլ ընտրությունների արտահերթության ռեժիմը չէ, այլ այն, թե որքանով են այդ ընտրությունները պայմանավորված հանրային պահանջով և ամենակարևորը՝ ինչ որակ են ունենալու, կկարողանա՞նք արդյոք ապահովել դրանց ազատությունը, արդարությունը և թափանցիկությունը»,- ասում է Լիլիթ Գալստյանը։
