«Օպերատիվ շտաբի աշխատանքը ուղղված է տեղահանվածների սոցիալ-տնտեսական խնդիրների վերհանմանը և հնարավորինս աջակցմանը»,- «Առաջին լրատվական»-ի հետ զրույցում ասաց ՀՀ-ում Արցախի կառավարության օպերատիվ շտաբի աշխատանքները համակարգողի տեղակալ Սրբուհի Արզումանյանը:
Նրա խոսքով՝ ներկայում կատարվում է որոշակի խնդիրների գույքագրում. «Մենք նաև մշտական օպերատիվ կապ ենք պահպանում Արցախի Հանրապետությունում գտնվող համապատասխան պատասխանատու օղակների հետ՝ հնարավորինս մեղմելու այն խնդիրները, որոնք ամեն օր և ամեն ժամ վերհանվում են ու մշտապես փոփոխվող են»:
Նա ընդգծեց՝ օպերատիվ շտաբը արձագանքում է մարդկանց կողմից բարձրացված բոլոր խնդիրներին, սակայն միշտ չէ, որ դրանք լուծում են ստանում. «Մենք աշխատում ենք 7-օրյա ռեժիմով, ունենք թեժ գիծ»:
Անդրադառնալով առաջնահերթ խնդիրներին՝ մեր զրուցակիցն ասաց. «Հարցերից երկրորդը իր բովանդակությամբ և բարդության աստիճանի ծավալով կեցության հարցն է, իսկ առաջինը, բնականաբար, մեր զոհվածների, վիրավորների ընտանիքների խնդիրներն են, այդ թվում նաև հոգեբանական»:
Սրբուհի Արզումանյանը նշեց, որ այն արցախցիներին, ովքեր բնակատեղի չունեն Արցախում, կոչ է արվել առայժմ ձեռնպահ մնալ Արցախ մեկնելուց. «Նրանք պետք է փորձեն կապ հաստատել նախկին իրենց վարչական կենտրոնների պատասխանատուների հետ»:
Մանրամասն՝ տեսանյութում: