Երեկ հանդիպելով «Սելիգեր 2011» երիտասարդական համաժողովին՝ Ռուսաստանի վարչապետ Վլադիմիր Պուտինն անդրադարձել է ԱՄՆ տնտեսական ճգնաժամի խնդիրներին, իսկ ԱՄՆ-ին անվանել է համաշխարհային տնտեսության «պարազիտ» (մակաբույծ): «Երկիրը պարտքով է ապրում: Դա նշանակում է, որ նրանք ո՛չ թե ապրում են միջոցներին համապատասխան, այլ պատասխանատվության մի մասը դնում են ողջ համաշխարհային տնտեսության վրա, հայտնի կերպով մակաբույծ են դառնում միջազգային տնտեսության համար: Փառք Աստծո, որ դոլարի արժեզրկում տեղի չունեցավ, նրանք ցուցաբերեցին բավականին ողջախոհություն և պատասխանատվություն»:
Ինչպես գրում է The Wall Street Journal-ը, «վարչապետ Վլադիմիր Պուտինը Միացյալ Նահանգներին անվանեց «պարազիտ» պետական պարտքի մեծության համար՝ հիշելով մի եզր, որն օգտագործում էին խորհրդային առաջնորդները՝ սևացնելու համար մարդկանց, որոնք չէին աշխատում, սովորում կամ ծառայում կոմունիստական պետությանը»: Պուտինը նաև ասել է, որ Օբամայի որոշումը՝ բարձրացնելու պետական պարտքի վերին շեմը, ոչ այլ ինչ է, քան «համակարգային որոշումների ընդունման հետաձգում»:
Foreign Affairs-ն այս կապակցությամբ հավելում է, որ ԱՄՆ դեֆոլտի դեպքում կտուժեր նաև Ռուսաստանը, քանի որ այդ երկիրն ունի ամերիկյան պետական պարտատոմսեր: Նշվում է նաև, որ անցած տարվա հոկտեմբերից այդ պարտատոմսերի ծավալը ՌԴ իշխանությունները զգալի կրճատել են՝ 176 մլրդ դոլարից մինչև 115 մլրդ:
