2011 թվականի հուլիսի 31-ին հնդկահայոց հոգևոր հովվությունը Կալկաթայի (Հնդկաստան) Սուրբ Նազարեթ Մայր եկեղեցում տոնեց հայ անվանի երաժիշտ Մակար Եկմալյանի ծննդյան155-ամյակը:
Երեկոն սկսվեց Հայոց մարդասիրական ճեմարանի երգչախմբի կատարմամբ մեծ երգահանի «Ով հայոց Աստված» երգով, որին հաջորդեցին մեծանուն կոմպոզիտորի մի շարք ստեղծագործություններ:
Համերգի ավարտին հնդկահայոց հոգևոր հովիվ, Հայոց մարդասիրական ճեմարանի կառավարիչ Տ. Խորեն վարդապետ Հովհաննիսյանը ներկաներին հանգամանալից ներկայացրեց Մակար Եկմալյանի կյանքն ու գործունեությունը, նրա թողած ժառանգությունը, անդրադարձավ այն բացառիկ դերակատարությանը, որ ունի մեծ երգահանը հայ հոգևոր և աշխարհիկ երգարվեստում: Հայր Սուրբն իր խոսքը եզրափակեց մեջբերելով Կոմիտաս վարդապետի գնահատականն ուղղված Մակար Եկմալյանին. «Յարգելի երաժիշտ Պ. Մակար Եկմալեանը մեր երգեցողութեան ամայի անդաստանի մէջ ներդաշնակութեան անդրանիկ բուրաստանը տնկեց: Սրտանց ուրախ ենք, որ հայերս այժմ կարող ենք պարծել, թէ մենք էլ յետ չենք մնացել վսեմ գեղարուեստի և կատարելագոյն երաժշտութեան զարգացումից»:
Ձեռնարկին մասնակցեցին եկեղեցու վարչության անդամները, կալկաթաբնակ հայորդիներ, Հայոց մարդասիրական ճեմարանի ուսուցիչները, աշակերտները, հրավիրյալներ:
