«Առաջին լրատվականը» ԱԳՆ մամլո քարտուղար Տիգրան Բալայանից փորձեց ճշտել ԱԳՆ նախարարության արձագանքը Սիրիայում կատարված վերջին իրադարձությունների վերաբերյալ: Հիշեցնենք, որ սիրիական տանկերը ռմբակոծել են Համա քաղաքը՝ 1982-ի սոսկալի ջարդերի վայրը՝ սպանելով առնվազն 4 քաղաքացիական անձի: Նպատակը Բաշար Ալ-Ասադի վարչակարգի դեմ ելույթները լռեցնելն է: Զոհերի ընդհանուր թիվը հասել է մի քանի տասնյակի:
«Ինչ վերաբերում է դիրքորոշմանը, ապա Սիրիայում տեղի ունեցած դեպքերի մասին մենք արտահայտել ենք մեր դիրքորոշումը: Այն չի փոխվել»,- ասել է Տ. Բալայանը և ներկայացրել է ԱԳՆ 2011 թվականի մարտի 23-ի դիրքորոշումը, այն է. «Մենք ուշադրությամբ հետևում ենք Միջին Արևելքում և Հյուսիսային Աֆրիկայում տեղի ունեցող իրադարձություններին: Այդ տարածաշրջանը Հայաստանին աշխարհագրորեն բավական մոտ է գտնվում, այդ երկրներում կան հոծ հայ համայնքներ, այդ տարածաշրջանի ժողովուրդների հետ հայ ժողովուրդն ունի ավանդական բարեկամական կապեր: Մենք կողմ ենք, որպեսզի բոլոր հարցերը լուծվեն երկխոսության, բանակցությունների, ներազգային համերաշխության միջոցով: Մենք պատրաստակամ ենք, անհրաժեշտության դեպքում, մարդասիրական օգնություն տրամադրել այդ երկրների բնակչությանը»:
Մեր հարցին՝ արդյոք բախումների հետևանքով զոհվածների թվում չկա՞ն հայեր, ԱԳՆ մամլո խոսնակն ասաց, որ այս պահի տվյալով՝ զոհվածների թվում հայեր չկան, և արտգործնախարարությունը մշտական կապի մեջ է դեսպանության հետ: