ԼՂՀ Քաղաքացիական նախաձեռնությունների կենտրոնի ղեկավար Արթուր Ոսկանյանն «Առաջին լրատվականի» հետ զրույցում նշեց, որ ինքը սխալ է համարում ԱՄՆ Կոնգրեսի քայլը՝ դադարեցնել ֆինանսական աջակցության տրամադրումը Լեռնային Ղարաբաղին:
«Արդեն քանի տարի է՝ Միացյալ Նահանգները ֆինանսական աջակցություն է ցուցաբերում Արցախին, և այդ օգնությունն հիմնականում ուղղվում է քաղաքացիական հասարակության զարգացմանը: Կարծում եմ՝ ԼՂ իշխանությունները արդարացնում են այն նպատակները, որոնց համար տրամադրվում է այդ գումարը, և ճիշտ չէ, որ Միացյալ Նահանգները մերժել է Արցախին ֆինանսական աջակցություն տրամադրել»,- նշեց նա:
Ոսկանյանը համոզված է, որ այն գումարները, որոնք Միացյալ Նահանգները տրամադրել է Արցախին, ծառայել են իրենց նպատակին, «և այժմ անհասկանալի է ԱՄՆ-ի Կոնգրեսի դիրքորոշումը»:
Հարցին, թե Freedom House իրավապաշտպան կազմակերպության զեկույցում Արցախը մասամբ ազատ երկիր համարելու հանգամանքը որքանո՞վ է ազդել Կոնգրեսի որոշման վրա, Ոսկանյանը պատասխանեց.
«Իհարկե, բացեր և թերություններ կան, ամեն ինչ չէ, որ այնպես է, ինչպես կցանկանայինք լիներ, բայց այն, որ Արցախում ժողովրդավարությունը զարգանում է՝ փաստ է: Բնական է, որ մեր տարածաշրջանում աշխատող և հակամարտությամբ զբաղվող միջազգային կազմակերպությունների զեկույցները ազդում են ԱՄՆ Կոնգրեսի որոշման վրա, բայց ամեն դեպքում ես կարծում եմ՝ սխալ էր այդքան խիստ վերաբերվել Ղարաբաղին»: