Իսպանիայում հերթական ողբերգությունն է գրանցվել ցլերի մասնակցությամբ տոնական միջոցառման ժամանակ: Միջադեպը տեղի է ունեցել Ռաֆելբունյոլ քաղաքում, որը գտնվում է իսպանական Վալենսիա նահանգում: Այս մասին հաղորդում է Las Provinicias-ը: Անցյալ շաբաթ այնտեղ անցկացվել է «Ցլերը փողոցում» փառատոնը, որի ժամանակ ցլերին ազատ են արձակում վանդակներից, որպեսզի նրանք քայլեն ու վազեն քաղաքի փողոցներում՝ ադրենալինի լրացուցիչ մասնաբաժին պարգևելով քաղաքի բնակիչներին: Այդպիսի վազքերից մեկը նկարահանվել է տեսախցիկով, ուր պատկերված են 50-ամյա Վինսենտեի կյանքի վերջին վայրկյանները, երբ նա սպանվում է ցլի կողմից: Տղամարդը փողոց էր դուրս եկել վարդագույն հովանոցով, ինչն էլ, հավանաբար, գրավել էր ցլի ուշադրությունը: Մի քանի հարվածով ցուլը տղամարդուն տապալել է գետնին՝ լուրջ վնասվածքներ հասցնելով կրծքավանդակի շրջանում: Վինսենտեին շտապ տեղափոխել են հիվանդանոց, սակայն բժիշկները ոչնչով չեն կարողացել օգնել նրան: Նշվում է, որ տղամարդն այդ օրը գինովցած է եղել և դիտավորյալ է վարդագույն հովանոցով հայտնվել ցլերի դիմաց՝ փորձելով գրավել նրանց ուշադրությունը:
Տեսանյութը կարող եք դիտել այստեղ՝ http://videos.levante-emv.com/nacional/20110731/cornada-mortal-encierro-rafelbunyol-24498.shtml
