«Տենց ջարդող-փշրողներ են, թող գային Շուշի։ Էդքան մարդ որ Շուշիում լիներ, ոչ Շուշին կտայինք, ոչ էլ որևէ մեկ այլ տարածք։ Սիրտները էդքան ցավում ա, թող վեր կենան հենց հիմա էլ գան ու հետ գրավեն Շուշին։ Բա դոշ ծեծող են, թող գան, մենք դեռ ստեղ ենք։ Տղերքը դեռ կանգնած են Շուշիի համար»,- «Առաջին լրատվական»-ի հետ զրույցում ասաց պաշտպանության նախկին փոխնախարար, գեներալ Գագիկ Մելքոնյանը։
Նրա խոսքով՝ եթե հենց այս պահին 1500 մարդ այդ ամբոխից հավաքվի, ինքն էլ դրանց դիմացից կգնա, ու կվերցնեն Շուշին: «Եթե ասում եք՝ էդ մարդը հանձնել ա հողերը, դուք էլ չեք համաձայնում դրա հետ, ուրեմն եկեք գնանք կռվենք։ Ինչի՞ եք սպասում, թե՞ դուխներդ մենակ դուռ-լուսամուտ ջարդելուն ա հերիքում։ Բա եկեք ստեղ թուրքի գլուխը ջարդեք, բա ո՞ւր էիք մինչև հիմա։ Բա կռիվ էր, ո՞ր ծակն էիք մտել, որ տենց միանգամից սաղդ ծակից հելաք»,- ասաց Մելքոնյանը։
Մեր դիտարկմանը՝ խոսակցություններ կան, որ Արցախում հեղաշրջման փորձ է եղել, թույլ չեն տվել Շուշի լրացուցիչ զենք մտցնել, միտումնավոր հետ են կանչել, որը հնարավորություն է տվել հակառակորդին ամրապնդվել Շուշիում, Մելքոնյանը պատասխանեց. «Ես այդտեղ չեմ եղել, չգիտեմ՝ ով է նման հրաման տվել, ով է այդ դավաճանը։ Բայց ամեն ինչ պետք է պարզել, պարզել՝ դավաճանություն եղե՞լ է, թե՞ ոչ։ Ամեն բան պետք է բացահայտվի։ Ամեն ինչ դեռ վերջացած չի։ Կրկնում եմ՝ համաձայն չեն կատարվածի հետ, տղա են, թող զենք վերցնեն գան կռվեն, ոչ թե պատերի տակ դժգոհեն»։
Անդրադառնալով Հայաստանում հեղաշրջման փորձին՝ Մելքոնյանն ասաց, որ դիրքերում է, չի տեսել, չգիտի՝ ով ինչ է արել։ «Ես մի քանի անգամ բոլորին խնդրեցի գալ, հավաքվել, պատերազմն ավարտել, հետո գնալ իրենց քաղաքական հարցերը լուծել, հրաժարական պահանջել և այլն»,- ասաց Մելքոնյանը։
