Ոսկեդրամը, որը պատրաստել էր Մարկուս Յունիուս Բրուտուսը՝ Գայուս Հուլիուս Կեսարի սպանությունը ոգեկոչելու համար, Մեծ Բրիտանիայում աճուրդի է հանվել 2,7 միլիոն ֆունտ ստեռլինգով (3,5 միլիոն ԱՄՆ դոլար), հայտնում է աճուրդի կազմակերպիչ, Roma Numismatics դրամագիտական ընկերությունը:
Մետաղադրամը հատվել է մ.թ.ա 42 թվին՝ Կեսարի սպանությունից երկու տարի անց: Ոսկեդրամի դիմերեսին պատկերված է Բրուտուսի պրոֆիլը: Նրա դիմանկարի շուրջը հատված են BRVT IMP (Brutus Imperator- կայսր Բրուտուս) և L PLAET CEST (Lucius Plaetory Cestian – Լուցիուսը՝ գլուխ Հռոմում) արտահայտությունները: Դարձերեսին տեսանելի են երկու դաշույն և հին հռոմեական ֆետրե գլխարկ, որը հռոմեացիները կապում են ազատության աստվածուհի Լիբերտասի հետ: Հռոմում այս գլխազարդը տրվել է նաև ազատություն ստացած ստրուկներին: Ներքեւի մասում հատված է EID MAR արտահայտությունը (15 մարտի, Կեսարի սպանության օրը):
Մետաղադրամը պատկանել է 19-րդ դարի շվեյցարացի հնագետ Բարոն Գուստավ Կառլ Ֆերդինանդ ֆոն Բոնստոնտենին, որը նաև Ավստրիայի կայսր Ֆերդինանդ Առաջինի սենեկապետն էր։
Աճուրդի ներկայացուցիչների խոսքով ՝ աշխարհին հայտնի է մոտ 88 EID MAR արծաթե և երեք ոսկե մետաղադրամ, որոնցից երկուսը ներկայում գտնվում են Բրիտանական թանգարանի և Գերմանիայի Դաշնային բանկի տրամադրության տակ:
Կեսարը սպանվել է մ.թ.ա. 44 թ. մարտի 15-ին`սենատորների դավադրության արդյունքում` Գայուս Կասիուս Բրուտուսի և Մարկուս Բրուտուսի գլխավորությամբ: Կեսարի սպանության դրդապատճառը Հռոմեական հանրապետության վերականգնումն էր: Կեսարի մահից հետո Կապիտոլիումը գրաված դավադիրները չստացան ժողովրդի աջակցությունը, քանի որ Մարկուս Անտոնիուսը արժանացավ ժողովրդական համակրանքի: Դավադիրները, ի վերջո, պարտվեցին քաղաքացիական պատերազմում, որը բռնկվեց Կեսարի մահից անմիջապես հետո: