Փաստաբան Ալեքսանդր Սիրունյանը դիմել է ՀՀ Ազգային անվտանգության ծառայությանը և գլխավոր դատախազին՝ պահանջելով քրեական գործ հարուցել նախկին վարչապետ, Հանրային խորհրդի նախկին նախագահ Վազգեն Մանուկյանի նկատմամբ։ Փաստաբանը իրավապահ մարմինների ուշադրությունն է հրավիրել վերջինիս կողմից Հայաստանի Հանրապետության իշխանությունը ոչ սահմանադրական եղանակով փոփոխելու կոչեր իրականացնելու փաստի վրա։
Սիրունյանն իր դիմումին կցել է նաև Վազգեն Մանուկյանի հայտարարության տեքստը և կոչ արել քրեական գործ հարուցել։
Հիշեցնենք, որ պատերազմական իրավիճակում, երկրում հաստատված ռազմական դրության պայամններում երեկ Վազգեն Մանուկյանը հայտարարեց, որ այս կառավարությունը պետք է հրաժարական տա՝ բանակին հանձնելով ողջ իշխանությունը, ընդ որում՝ դա պետք է անի կամավոր, առանց ցնցումների, որոնք կարող են կործանարար լինել: «Բանակը, իր ձեռքը վերցնելով ողջ իշխանությունը, պետք է կազմի միասնական Պաշտպանության կոմիտե Արցախի հետ միասին՝ կազմակերպելով պատերազմական ներկա իրավիճակին անհրաժեշտ միջոցառումները, ապահովելով վստահություն և գնալով բանակցությունների շահագրգիռ պետությունների, միջազգային կառույցների հետ»,- նշվում էր հայտարարության մեջ։ Վազգեն Մանուկյանի այս հայտարարությանն ավելի ուշ միացան ՀՀ նախկին վարչապետ Հրանտ Բագրատյանը, Ազգային օրակարգ կուսակցության ղեկավար Ավետիք Չալաբյանը, Դավիթ Շահնազարյանը և այլ անձինք։
Փաստաբան Ալեքսանդր Սիրունյանն «Առաջին լրատվական»-ի հետ զրույցում ասաց, որ նման հայտարարությունները ռազմական դրության ժամանակ քրեորեն հետապնդելի են ու անհապաղ պետք է քրեական գործ հարուցվի։ «Այդ արարքների համար Քրեական օրենսգրքում հոդված կա, 301 հոդվածը՝ իշխանությունը բռնի փոխելու կոչեր։ Այդ հայտարարությունները լիովին տեղավորվում են այս հոդվածի տակ, ու Վազգեն Մանուկյանի, նրա մյուս աջակիցների՝ Հրատ Բագրատյանի ու մյուսների նկատմամբ պետք է անհապաղ քրեական գործ հարուցվի։ Բայց, քանի որ այդ քայլն առաջինը արել է Վազգեն Միքայելի Մանուկյանը, ես մենակ իր մասով եմ գրել իրավապահներին։
Մնացածը թող իրենք պարզեն»,- ասաց Սիրունյանը՝ հավելելով, որ եթե ինքը լիներ գլխավոր դատախազ, ապա պատերազմական դրության պայմաններում Վազգեն Մանուկյանը երեկ արդեն պետք է ձերբակալված լիներ։
Մեր հարցին՝ ինչով է բացատրում իրավապահ մարմինների դանդաղկոտությունը, կամ քայլեր չձեռնարկելը նման արարք կատարած անձանց նկատմամբ, Սիրունյանը պատասխանեց. «Ես այն համոզմանն եմ, որ, մասնավորապես, ՀՀ դատախազությունը մինչ օրս զբաղված է ոչ թե հանցավորության դեմ պայքարով, այլ ուսմասվար բռնելով՝ կավիճ գողանալու համար։ Այս օրերին ամեն ինչ գրում են՝ պատերազմի մասին, թշնամու առաջխաղացման մասին, ուսմասվար, ֆիզկուլտի դասատու բռնելու մասին, գյուղապետի օգնական բռնելու մասին 200 հազար դրամի համար, բայց երեկվանից մենք այդպես էլ չենք տեսնում գլխավոր դատախազության արձագանքը կատարված հանցագործության վերաբերյալ»։
Ալեքսանդր Սիրունյանն ասաց, որ դիմումն այսօր է ուղարկել իրավապահներին և դեռ որևէ արձագանք, պատասխան չկա։
