«Այս փուլում Լեռնային Ղարաբաղի հարցը դիվանագիտական լուծում չունի։ Ադրբեջանը համաձայն է միայն Ղարաբաղի կապիտուլյացիային, իսկ առանց Արցախի չկա Հայաստան։ Մեր անելիքը պայքարելն է մինչև վերջ և անսասան, զենք վերցնել և կռվել այնքան՝ մինչև հնարավոր կլինի հասնել հարցի վերջնական լուծման»,- այսօր իր ուղիղ եթերի ժամանակ հայտարարեց վարչապետ Նիկոլ Փաշինյանը։
Վարչապետի այս դիտարկումներից հետո կարելի է ենթադրել, որ, ըստ ամենայնի, հաջող չեն անցել Մոսկվայում նախատեսված արտգործնախարարների երկկողմ հանդիպումները, ինչպես նաև մեծ ակնկալիք չի կարելի ունենալ Փաշինյան-Ալիև հնարավոր հանդիպումից։
Քաղաքագետ Հակոբ Բադալյանի խոսքերով՝ ընդհանրապես քաղաքական և դիվանագիտական գործընթացների մեզ համար շահեկան և արդյունավետ ընթացքը պայմանավորված է հենց նրանով, թե մենք ինչպիսի ընթացք կապահովենք ռազմաճակատում, ինչպիսի վճռականություն և ուժ կդրսևորվի պատերազմական մարտահրավերին հակազդելու տեսանկյունից։ «Նիկոլ Փաշինյանի այս ընթացքում ելույթները ես դիտարկում եմ հենց այդ համատեքստում։ Այսինքն՝ դա նվազագույնն է, որ մենք պետք է ապահովենք քաղաքական և դիվանագիտական արդյունավետություն ակնկալելու և ստանալու համար։ Այս տեսանկյունից, կարծում եմ՝ խնդիրն այն չէ, թե դրսում մեզ համար ինչ-որ բան շահեկան է, կամ շահեկան չէ։ Խնդիրն այն է, որ մենք գիտենք մեզ նետված պատերազմը և դրան հակազդելու անհրաժեշտությունը, ինչպես նաև գիտենք, որ այնտեղ է որոշվում, թե ինչպիսի քաղաքական պայմաններ են դրվում արդեն քաղաքական դիվանագիտական գործընթացների սեղանին։ Այսինքն՝ այն մենք ենք թելադրո՞ւմ, թե՞ մեզ են թելադրում։ Վարչապետ Փաշինյանի ելույթը հենց այս տրամաբանության շրջանակում էր։ Որպեսզի մենք թելադրենք պայմանները, մենք պետք է պատրաստ լինենք դիմադրել և հետ մղել այն պատերազմական մարտահրավերը, որը նետված է մեզ»,- ասաց Բադալյանը։
Միևնույն ժամանակ, քաղաքագետի խոսքերով՝ դիվանագիտական հարթակում տեղի ունեցող գործընթացների արդյունքն էլ բացառապես մարտի դաշտում գրանցած արդյունքներով չի պայմանավորված։ Սակայն դա առանցքային, եթե ոչ ամենաառանցքային գործոնն է։ «Քաղաքական հարթակում ոչինչ ավտոմատ չի զարգանալու միայն ռազմաճակատի պատկերի հիման վրա, բայց առանցքայինը հենց այն է, որ հայկական կողմը ցույց տա իր վճռականությունը և կամային լինելը ռազմական մարտահրավերին հակազդելու առումով։ Սրանով է էապես պայմանավորվելու մնացած խաղաքարտերի արդյունավետ խաղարկումը քաղաքական, դիվանագիտական հարթության վրա»,-ասաց Հակոբ Բադալյանը։