Սոցիոլոգ Ահարոն Ադիբեկյանի կանխատեսմամբ՝ արտահերթ ընտրությունների անցկացման դեպքում մեծ հաջողություն կունենան այն կուսակցությունները, որոնք ունեն տեղական իշխանություններում աշխատողներ։ Այսինքն, ըստ Ադիբեկյանի՝ ԱԺ-ում շատ պորտֆելներ կունենան ՀՀԿ-ն, ԲՀԿ-ն, ՕԵԿ-ը և ՀՅԴ-ն։ Ըստ Ադիբեկյանի՝ ՀԱԿ-ը ունի հեղինակություններ, որոնց միջոցով ուժեղ է մեծ քաղաքներում՝ Երևանում, Գյումրիում, Վանաձորում։ Վերջին կուսակցությունը, որ շատ ձայներ կհավաքի խորհրդարանական ընտրություններում, ըստ Ադիբեկյանի, կլինի ՄԱԿ-ը կամ ՍԻՄ-ը։
Այն հարցին, թե ընտրազանգվածի կողմնորոշման վրա ի՞նչ ազդեցություն կարող են ունենալ վերջին ներքաղաքական զարգացումները, մասնավորապես իշխանության և ՀԱԿ-ի միջև ընթացող երկխոսությունը, Ադիբեկյանը պատասխանեց.
«Էլեկտորատը շատ ուշ է արձագանքում ներքաղաքական զարգացումներին։ Ժամանակ է պետք, որպեսզի մարդիկ կարդան, լսեն, մեկնաբանություններ անեն»։
Ըստ սոցիոլոգի՝ երկխոսությունը ազդեցություն կունենա ընտրազանգվածի վրա, երբ երկխոսության արդյունքը հայտնի կլինի, իսկ առայժմ այդ արդյունքը դեռ պարզ չէ։ Այնուամենայնիվ, ըստ Ահարոն Ադիբեկյանի՝ ՀԱԿ-ը երկխոսության արդյունքում կորցրել է արմատական ընդդիմադիր համարվող ընտրողներին, որ կազմում են ընտրազանգվածի 7%-ը։ «Այդ արմատական ընդդիմությունը արդեն մտածում է ՀՅԴ-ի և «Ժառանգության» միջև ընտրություն կատարելու մասին»,- ասաց Ադիբեկյանը։
Ադիբեկյանի խոսքով, ՀՀԿ-ն երկխոսությունից հետո ևս կկորցնի որոշ ձայներ։ Իշխանական կուսակցություններից ավելի ընդդիմադիր է ԲՀԿ-ն, քան ՕԵԿ-ը, ուստի իշխանական, սակայն կոալիցիայից դժգոհ մարդիկ ավելի հավանական է ընտրեն ԲՀԿ-ին։