Այսօր թատերագետ, հրապարակախոս, ՀԱԿ փոքր խորհրդի անդամ Արա Նեդոլյանն անդրադարձել է ՀԱԿ-իշխանություն երկխոսությունը: Հարցին՝ երկխոսությունը ի՞նչ պետք է տա երկրի ներկա վիճակին, Ա. Նեդոլյանը պատասխանել է, որ ներքին երկխոսությունը, ինչպես նաև երկխոսությունը հասարակության հետ, հասարակության ներսում, ի սկզբանե որդեգրած է Կոնգրեսի՝ իբրև կոլեգիալ, բազմատարր, բաց կառույցի կողմից: Այժմ այդ քաղաքական մեխանիզմը կիրառվում է որպես կառավարման լեգիտիմության վերականգնման միջոց:
Անդրադառնալով բանակցությունների օրակարգում իշխանական առաջարկին՝ Նեդոլյանը նշեց, որ դա ընկալելի չէ, քանի որ վերցված է քաղաքական մշակույթ բառը, բայց առանց գիտակցման՝ ուղղակի ռեզոնանս են անում իբրև անորոշ մի գաղափար: «Քաղաքական մշակույթի ստեղծման իմաստը գործողությունները բաց, թափանցիկ, բանական, համընդհանուր կոմունիկատիվ դաշտ բերելն է, այսինքն՝ քաղաքականության վերաքաղաքականացումը»,- ասել է բանախոսը: Մինչ այժմ քաղաքականությունը մեզ ցույց չէր տալիս համընդհանուր մեխանիզմներ, ինչից հետևում էր, որ հարցերը լուծվում էին ոչ քաղաքական կուլտուրայի ներքո և ոչ էլ քաղաքական ձևերով, ապա այժմ առաջին նախադեպն է, երբ ստեղծվում է համապետական հասարակական մեխանիզմ: Քաղաքական կուլտուրա հաստատելը, Արա Նեդոլյանի խոսքերով, հենց դա է նշանակում, երբ սկսում են գործել հարցերի լուծման բանական-բանակցային մեխանիզմները, և վերանում է ուժի կիրառումը: Դա անկախության հաստատման համար մեկ հարցն է, լեգիտիմ իշխանությունների ձևավորման մեխանիզմի առաջացումը:
Քաղաքական մշակույթը, ըստ Ա.Նեդոլյանի, ամբողջությամբ բանակցային բնույթ ունի, դա արգումենտի փոխանակումն է հասարակության հետ, հասարակության աչքերի առաջ. «Քաղաքակիրթ աշխարհում հենց դա է քաղաքականությունը, այսինքն՝ արժեքային համակարգի սահմանում, դրա հիման վրա՝ հայեցակարգային մտածողության միացում»: Նրա խոսքերով՝քաղաքականության պայմաններում իշխանություն կոչվածը արժեհամակարգերի ու հայեցակարգերի ձևավորող, խոսնակն է, և ոչ թե ուղղակի իշխանություն իրականացնողը, նա պարզապես ձևակերպում է հասարակական կարծիքը, գտնվում է ձևակերպողի, հասարակության կոորդինատորի դերում:
«Սա քաղաքական կուլտուրա է, որը ճչացող չափերով պակասում է անկախության առաջին օրերից, երբ պետք է սահմանվեր ներքին քաղաքական կուլտուրա: Մինչ այժմ գործնական որոշումներ ընդունելը գրեթե չէր առնչվում հասարակական մտածողության, նրա ներքին դիալոգի հետ, և հասարական դիալոգն էլ դրա պատճառով ակտուալ չէր, զարգացած չէր, խեղճ էր ու կոպիտ, ապա այժմ առաջին դեպքն է, երբ երկխոսությունը սկսվել է հասարակություն-իշխանություն ամենաէական կետում, և կարող է զարգանալ հեռանկարում իբրև պոլիլոգ՝ բազմախոսություն՝ բոլորը բոլորի հետ, և առաջին անգամ այս խոսակցությունը սկսում է մտնել գործնական ոլորտ, գործողության փուլ. սա նշանակում է համընդհանուր լեգիտիմացում, այսուհետ լեգիտիմ ես այնքանով, որքանով մասնակցում ես բանական տրամախոսությանը, և այսպիսի՝ ամենքի լեգիտիմ իշխանությունը և նշանակում է սահմանադրական կարգի հաստատում, հանրապետության կայացում»,- ասաց Արա Նեդոլյանը:
