Էստոնիայի արտգործնախարար Ուրմաս Ռեյնսալուն հայտարարել է Լեռնային Ղարաբաղի հակամարտության խաղաղ կարգավորման անհրաժեշտության մասին՝ Հայաստանի և Ադրբեջանի միջև լարվածության սրման ֆոնին, և տարածաշրջանում իրավիճակի վերաբերյալ ՄԱԿ-ի Անվտանգության խորհրդում խորհրդակցություններ նախաձեռնելու մասին:
«Լեռնային Ղարաբաղի տարածաշրջանում իրավիճակը ծայրաստիճան մտահոգիչ է: Կողմերին կոչ եմ անում անհապաղ դադարեցնել ռազմական գործողությունները և ձեռնարկել բոլոր միջոցները` իրավիճակի հետագա սրումից խուսափելու համար: Բռնության կիրառումը տարաձայնությունների լուծման համար դատապարտելի է: Կարևոր է, որ կողմերն անմիջապես դադարեցնեն թշնամական գործողությունները և անցնեն տարաձայնությունների խաղաղ կարգավորմանը: Էստոնիան, որպես ՄԱԿ-ի Անվտանգության խորհրդի անդամ, Լեռնային Ղարաբաղում տեղի ունեցող իրադարձությունները քննարկելու համար խորհրդակցություններ է նախաձեռնում ՄԱԿ-ի Անվտանգության խորհրդում»,- գրել է Ռեյնսալուն Facebook-ում:
