Վրաստանի պատվիրակությունը ԵԱՀԿ-ի անվտանգության ոլորտում համագործակցության ֆորումում դատապարտել է Աբխազիայի և Հարավային Օսիայի ինքնահռչակ հանրապետությունների տարածքում ՌԴ կողմից անցկացվող «Կովկաս-2020» զորավարժությունները:
Ըստ Վրաստանի արտգործնախարարության, վրացական պատվիրակությունը զորավարժությունների անցկացումը որպես միջազգային իրավունքի, Հելսինկիի եզրափակիչ ակտի և 2008թ.-ի օգոստոսի 12-ի հրադադարի համաձայնագրի խախտում է դիտարկում:
«Ռուսաստանի ագրեսիվ և սադրիչ գործողությունները սպառնում են անվտանգությանը և ապակայունացում են իրավիճակը տարածաշրջանում»,- ասվում է պատվիրակության հայտարարության մեջ:
Ըստ Վրաստանի ԱԳՆ-ի, Թբիլիսիի հայտարարությանն աջակցել են Եվրամիության, ԱՄՆ-ի, Կանադայի, Մեծ Բրիտանիայի և Ուկրաինայի պատվիրակությունները՝ Ռուսաստանին կոչ անելով դադարեցնել Վրաստանի ինքնիշխանության և տարածքային ամբողջականության ոտնահարումը:
Առանձին հայտարարություն է արվել ԵԱՀԿ-ում ԵՄ առաքելության կողմից, որում նշվում է, որ «ինքնիշխան պետության տարածքում առանց այդ պետության համաձայնության զորավարժություններ անցկացնելը միջազգային իրավունքի նորմերի ու սկզբունքների խախտում է»:
