Լեհաստանի նախագահ Բրոնիսլավ Կոմորովսկու Հայաստան պաշտոնական այցի ընթացքում համաձայնագիր է ստորագրվել, ըստ որի՝ մրցույթում հաղթած լեհական արժեթղթեր տպող մի ընկերություն ստացել է հայկական անձնագրերը տպելու պատվեր:
Երեկ հայ և լեհ գործարարների հետ հանդիպման ժամանակ Լեհաստանի նախագահը այդ համաձայնագիրը համարել է գործարար կապերի զարգացման լավ նշան:
«Վստահ եմ, որ հպարտ մի երկրի՝ Հայաստանի քաղաքացիները, ձեռքներին ունենալով իրենց քաղաքացիությունը փաստող անձնագիրը, նաև կիմանան, որ դրանում կա Լեհաստանի որոշակի նպաստը», – Հայաստանի նախագահի մամլո գրասենյակի փոխանցմամբ՝ ասել է Կոմորովսկին և հավելել.
– Կցանկանայի վստահություն հայտնել, որ մյուս գործարարներն ականատես լինելով այս պայմանագրին և դրա հաջողությանը՝ կխրախուսվեն հետագայում Հայաստանում ներդրումներ անելու համար»:
Լեհաստանի նախագահը՝ դիմելով Հայաստանի նախագահ Սերժ Սարգսյանին նշել է, որ կենսաչափական այն անձնագրերը, որ Հայաստանի քաղաքացիները կունենան, նաև Հայաստանի և Լեհաստանի միջև հարաբերությունների բարձր մակարդակի գերազանց առհավատչյա կլինեն:
Հիշեցնենք,որ կենսաչափական անձնագրերի ներդրումը Հայաստանում նախատեսվում էր սկսել այս տարվա սեպտեմբերին, սակայն գործընթացը հետաձգվել է մեկ տարով:
