Այսօր հրավիրված մամուլի ասուլիսում ՀՀ տարածքային կառավարման նախարարության միգրացիոն ծառայության վարչության պետ Գագիկ Եգանյանը ներկայացրեց նոր կայքէջի թողարկումը, որ կարելի է այցելել www.smsmta.am հասցեով:
Կայքէջում տեղեկություններ են զետեղված միգրացիայի ոլորտում ընդգրկված ազգային օրենսդրության և միջազգային իրավապայմանագրային դաշտի վերաբերյալ:
Կայքից կարելի է տեղեկանալ օտարերկրացիների Հայաստան մուտքին, ինչպես և այլ հարցերի՝ հաշվի առնելով, որ 1988-92 թթ. Ադրբեջանից բռնագաղթած միգրանտները ամենամեծ հոսքն են կազմում: Միգրացիոն վիճակագրության բաժինը, իր հերթին, հնարավորություն է տալիս մշտական ուղևորափոխադրումների ծավալների վերաբերյալ տեղեկություններ ստանալ տարեկան և ամսական կտրվածքով:
Գագիկ Եգանյանն ասաց, որ վերջին 1.5 տարում միգրացիոն խնդիրների նկատմամբ շահագրգիռ են ինչպես պետական մարմինները, այնպես էլ խնդրով զբաղվող մասնագետները, մեծ է առանձին գործիչների, նաև հասարակության լայն խմբերի հետաքրքրվածությունը: Նա նշեց նաև, որ եթե վերջին տարիներին արտագաղթի ծավալները աճեին, պետք է աճեր Հայաստանից մեկնող ուղևորների թիվը: Եգանյանը ներկայացրեց Հայաստանից մեկնող ուղևորների թիվը վերջին տարիների կտրվածքով: Ըստ այդմ՝ մեկնումների և ժամանումների տարբերությունը հետևյալն է. 2010թ.՝ 29,900, 2009թ.` 25,000, 2008թ.՝ 23,000:
Նրա խոսքով՝ պատկերը ցույց է տալիս, որ մեկնողների թիվը 2010 թ. աննշան է աճել` 4900-ով, և սա այն թիվը չէ, որ մեկնումները որակվեն որպես զանգվածային արտագաղթ:
Ներկայացնելով մարդկային զարգացման 2009թ. զեկույցը՝ միգրացիոն ծառայության վարչության պետը նշեց, որ այդ տվյալներով 1988-2001 թթ. Հայաստանից արտագաղթել է 700 հազարից մինչև 1.5 միլիոն քաղաքացի, 2001-2008 թթ.` 150,000։
2008 թ. ինչ-ինչ պատճառներով ուսումնասիրություններ չեն կատարվել:
