ԱՄՆ նախագահ Դոնալդ Թրամփն արձագանքել է մամուլի այն հաղորդումներին, թե իբր Թեհրանը հարձակում է նախապատրաստում Միացյալ Նահանգների դեմ:
Ավելի վաղ Politico պարբերականը, հղում անելով աղբյուրին, հաղորդել էր, որ Միացյալ Նահանգները մեղադրել է Իրանի իշխանություններին այն բանում, որ նրանք, իբր, գեներալ Ղասեմ Սոլեյմանիի սպանությանն ի պատասխան դիտարկում են Հարավային Աֆրիկայում ԱՄՆ-ի դեսպան Լանա Մարքսին վերացնելու հնարավորությունը:
«Իրանի կողմից Միացյալ Նահանգների վրա ցանկացած հարձակում, ցանկացած ձևով, կավարտվի Իրանի վրա հարձակմամբ, որը 1000 անգամ ավելի լայնածավալ կլինի»,- գրել է Թրամփը Twitter-ի իր էջում:
Իրանի ԱԳՆ պաշտոնական ներկայացուցիչ Սաիդ Հաթիբզադեն ասել է, որ Մարքսի դեմ մահափորձ իրականացնելու Թեհրանի ծրագրերի վերաբերյալ մեղադրանքներն անհիմն են: Միաժամանակ, նա նշել է, որ Իրանը չի մոռանա և չի ների Վաշինգտոնին Սոլեյմանիի սպանությունը:
