Բեռլինյան կլինիկայում Ալեքսեյ Նավալնիից վերցված նմուշների վերլուծության արդյունքները Գերմանիան փոխանցել է Քիմիական զենքի արգելման կազմակերպությանը (ՔԶԱԿ): Այս մասին հայտնում է dpa գործակալությունը՝ հղում անելով Գերմանիայի Պաշտպանության նախարարությանը:
Միևնույն ժամանակ, նրանք նշել են, որ Բեռլինը չի պատրաստվում այդ տվյալներն ուղղակիորեն փոխանցել Մոսկվային, քանի որ Ռուսաստանը ՔԶԱԿ անդամ է:
Գերմանիայի կառավարության ներկայացուցիչ Մարտինա Ֆիցը Ռուսաստանի իշխանություններին կրկին կոչ է արել տեղեկատվություն տրամադրել Նավալնիի թունավորման մասին: Դա Գերմանիայի և Ռուսաստանի հարաբերությունների հարցը չէ, խոսքը քիմիական զենքի կոնվենցիայի խախտման մասին է, ասել է նա:
Մեկ շաբաթ առաջ Գերմանիայի կառավարությունը, վկայակոչելով Բունդեսվերի լաբորատորիայի տվյալները, հայտարարել է, որ «կասկածից դուրս» է, որ Ալեքսեյ Նավալնին թունավորվել է Խորհրդային Միությունում մշակված մարտական «Նովիչոկ» քիմիական զենքի բաղադրությանը նման նյութով: Բեռլինը Ռուսաստանից պահանջել է բացատրել Նավալնիի հետ կատարվածը և հետաքննություն սկսել: Ռուսաստանի իշխանությունները մեղադրանքներն անհիմն են անվանել և պնդել, որ գերմանական կողմը դանդաղեցնում է իրենց հարցերին պատասխանելու գործընթացը:
Սեպտեմբերի 9-ին Գերմանիայի Դաշնային Հանրապետության դեսպանին կանչել են ՌԴ ԱԳՆ և կրկնել Ալեքսեյ Նավալնիի հետ կապված իրավիճակի վերաբերյալ ամբողջական բժշկական տվյալներով մանրամասն պատասխան տրամադրելու Ռուսաստանի պահանջը: Նշված նյութերի բացակայությունը Մոսկվան կդիտարկի որպես Բեռլինի կողմից օբյեկտիվ հետաքննության շրջանակում ճշմարտությունը բացահայտելու մերժում, և Նավալնիի հետ կապված նախորդ և հետագա գործողությունները՝ որպես Ռուսաստանի դեմ ուղղված կոպիտ և թշնամական սադրանք:
